Ըստ տնօրեն Կարինե Անդրեասյանի՝ իր գործունեության ընթացքում ընկերությունը պատրաստել է 13 մասնագետ։ Նրանցից ոչ մեկը, սակայն, պետական համակարգում չի աշխատում։ «Սի Էֆ Դաբլյու» ՓԲԸ-ն կիբեռանվտանգության ոլորտում խորհրդատվական ծառայությունների մատուցման որևէ պայմանագիր չի կնքել։
«Հայաստանի պետական հետաքրքրությունների ֆոնդ» ՓԲԸ-ի (ԱՆԻՖ) դուստր ընկերությունը՝ «Ձեռնարկատեր+պետություն հակաճգնաժամային ներդրումների կառավարիչ» ՓԲԸ-ն, 2023 թվականի մայիսին 1.5 մլրդ դրամ ներդրում է արել «Սի էֆ Դաբլյու» ՓԲԸ-ում՝ դառնալով դրա 49% բաժնետերը։
Այս ընկերությունը հիմնադրվել էր ներդրումը ստանալուց 8 օր առաջ։ Ընկերության տնօրենը Կարինե Անդրեասյանն է՝ Տիգրան Ավինյանի կնոջ՝ Մարիամ Պահլավունու ընկերուհին։ Անդրեասյանն ու Պահլավունին նաև համատեղ բիզես ունեն։ Նրանց է պատկանում «Լավ փրոդաքթս» ՍՊԸ-ի համապատասխանաբար 33 և 34%-ը։ Երբ «Սի էֆ Դաբլյուն» ստացել է ներդրումը, ԱՆԻՖ-ի հոգաբարձուների խորհրդի նախագահը Տիգրան Ավինյանն էր։
Մեր հրապարակումից հետո հոդվածին անդրադարձավ Երևանի քաղաքապետի մամուլի քարտուղար Հայկ Կոստանյանը։ Նա ֆեյսբուքյան իր էջում գրել էր, որ «Սի Էֆ Դաբլյու» ընկերության 51%-ի բաժնեմասի սեփականատերն ամերիկյան «Orbis Operations» ընկերությունն է։
Հարցում ուղարկեցինք Երևանի քաղաքապետի մամուլի խոսնակ Հայկ Կոստանյանին՝ խնդրելով պատասխանել, թե որտեղից նրան այդ և գրառման մեջ նշված մյուս տեղեկությունները։ Ինչպես նաև հարցրել էինք, թե ինչու է ինքն արձագանքել մեր հոդվածին, եթե երբևէ առնչություն չի ունեցել ԱՆԻՖ-ի կամ «Ձեռնարկատեր+պետություն հակաճգնաժամային ներդրումների կառավարիչ» ՓԲԸ-ի հետ։
Հարցումն արել էինք մարտի 26-ին, հինգ օր անց պատասխան ստացանք, որ անհրաժեշտ է կատարել լրացուցիչ աշխատանք, և մեր հարցերին կպատասխանեն 30-օրյա ժամկետում։ Թեև անտրամաբանական էր 30 օր խնդրել հարցերին պատասխանելու համար, քանի որ եթե նա նման գրառում է արել, ենթադրվում է, որ պիտի կարողանար նաև սեղմ ժամկետում պատասխանել գրառման վերաբերյալ մեր հարցերին, սակայն մենք սպասեցինք 30 օր։ Ի վերջո պատասխան չստացանք։
Ի դեպ սա Հայկ Կոստանյանից իր հայտարարության վերաբերյալ պարզաբանում ստանալու մեր երկրորդ փորձն էր։ Առաջին անգամ, երբ հարցում էին ուղարկել, նա պատասխանել էր, որ մեր հարցերի պատասխանները կարող ենք գտնել իր ճեպազրույցում։ Դրա ընթացքում, սակայն, մեր հարցերից որևէ մեկին պատասխան չէր տրվել։
«Հետքը» գրավոր հարցում ուղարկեց նաև «Ձեռնարկատեր+պետություն հակաճգնաժամային ներդրումների կառավարիչ» ՓԲԸ՝ ճշտելու քաղաքապետի խոսնակի ասած տեղեկությունը։
ՓԲԸ-ից պատասխանել են, որ «Սի Էֆ Դաբլյու» ընկերության 49%-ը պատկանում է իրենց, 48%-ը՝ «Արարատ թեքնոլոջիս» ՍՊԸ-ին, իսկ 3%-ը՝ «Հայկ հոլդինգս» ՍՊԸ-ին։
«Ամերիկյան ընկերությունների պատկանելիության շղթան առաջարկում ենք ճշգրտել Ընկերության նախկին տնօրենից կամ ամերիկյան ընկերություններից»,- նշել են պատասխանում։
Մենք այդպես էլ վարվել ենք։ Հարցում ենք ուղարկել ամերիկյան «Orbis Operations» ընկերության գլխավոր գործադիր տնօրենին։ Ամերիկյան ընկերությունից հայտնեցին, որ եղել են ներդրող «Սի Էֆ Դաբլյու» ՓԲԸ-ում, երբ այն արդեն ինն ամիս գործում էր։ Հիմա ընկերության գործունեությունը դադարեցված է։
Իր գրառման մեջ քաղաքապետի մամուլի քարտուղարը նաև նշել էր, որ ամերիկյան կողմը ձեռք է բերել իր մասնաբաժինը՝ ներդնելով 5.8 միլիոն ԱՄՆ դոլար արժողությամբ տեխնոլոգիա։
«Ձեռնարկատեր+պետություն» ֆոնդից պարզաբանեցին, որ խոսքը ոչ դրամային ներդրման մասին է։ «Արարատ թեքնոլոջիս» և «Հայկ հոլդինգս» ՍՊԸ-ները «Սի Էֆ Դաբլյու» ՓԲԸ-ում ներդրում են կատարել մտավոր սեփականության օգտագործման իրավունքի ձևով։ Ամերիկյան ընկերությունների կողմից ընկերության կանոնադրական կապիտալում կատարված ներդրման դրամային գնահատումը կազմել է 1 մլրդ 602 մլն 420 հազար դրամ:
«Ձեռնարկատեր+պետություն» ֆոնդից հետաքրքվել էին՝ արդյոք «Սի Էֆ Դաբլյու» ՓԲԸ-ն կատարել է պայմանագրով ստանձնած պարտականությունները։ Ֆոնդից պատասխանել են.
««Սի Էֆ Դաբլյու» ՓԲԸ-ի գործունեությունը ենթադրում էր կիբեռանվտանգության ոլորտում խորհրդատվական ծառայությունների մատուցում։ Ըստ մեր տեղեկությունների` «Սի Էֆ Դաբլյու» ՓԲԸ-ն 2023թ.-ից առ այսօր չի կնքել այդպիսի պայմանագրեր։ Սակայն Ընկերության ընթացիկ գործունեության մասին առավել մանրամասն տեղեկատվության, այդ թվում` հնարավոր համագործակցությունների մասին, կարող է տիրապետել Ընկերության նախկին տնօրենը, ով ի պաշտոնե ներգրավված է եղել այդ գործընթացում: Այնուամենայնիվ տեղեկացնում ենք, որ Ընկերության կողմից ստանձնած պարտավորությունների վերաբերյալ իրականացվում են լրացուցիչ ուսումնասիրություններ»։
«Սի Էֆ Դաբլյու» ՓԲԸ-ի տնօրեն Կարինե Անդրեասյանը մեր գրավոր հարցմանն ի պատասխան հայտնեց, որ ընկերությունն իր գործունեության ընթացքում պատրաստել է կիբեռանվտանգության 13 մասնագետ, որոնցից 5-ը ըստ «Orbis»-ի մասնագետների, ունեցել են «կիբեռանվտանգության աստղ» դառնալու նախադրյալներ։ Նա նշել է, թե չգիտի որտեղ են աշխատում այդ մասնագետները։
«Ցավոք, որքան լսել եմ, որոշները հիմա աշխատում են մասնավոր կազմակերպություններում՝ ինչը միաժամանակ վկայում է մեր կերտած մասնագիտական որակի, եւ ցավալիորեն՝ պետականամետ ծրագրի ձախողման մասին»,- գրել է Անդրեասյանը։
«Սի Էֆ Դաբլյու»-ի գործունեության գնահատման հարցին նա պատասխանել է, որ միակ հաջողությունը, որի վրա կարող են հիմնվել, այն է, որ կարողացել են ոգեշնչել նոր սերնդին։
«Թեպետ ես խորապես հիասթափված եմ ՀՀ կառավարության մակարդակով կայացված որոշումներից, որոնք վերջիվերջո խաթարեցին այս եզակի եւ կարեւոր նախաձեռնությունը, ես դեռեւս արժեք տեսնում եմ մեր իրականացրած ձեռքբերումների մեջ։ Եթե կա մի հաջողություն, որի վրա ես հիմնվում եմ, դա այն է, որ մենք կարողացանք ոգեշնչել եւ զորացնել նոր սերնդին՝ օգնելով երիտասարդ մասնագետներին երազել և հասնել համաշխարհային մակարդակի գիտելիքի, եւ հասկանալ, թե ինչպիսին կարող է լինել կիբեռանվտանգության գերազանցությունը։ Թեկուզ ծրագիրը կարճ տեւեց, այդ ձգտման եւ կարողությունների սերմանումը Հայաստանի երիտասարդների մեջ մնայուն եւ իմաստալից հաջողություն եմ համարում»,- նշել է Անդրեասյանը։
Անդրեսայանը անդրադարձել է նաև իր և Տիգրան Ավինյանի կնոջ՝ Մարիամ Պահլավու կապին։
«Իմ եւ Մարիամի անձնական ընկերությունը չի առնչվում այս նախագծի որոշումներին։ Թույլ տվեք միանշանակ ձեւակերպեմ՝ մեր ընկերությունը հիմնված է ընդհանուր մարդկային արժեքների վրա եւ երբեք չի հատել մասնագիտական սահմանները»,- նշել է նա։
Չնայած այն փաստին, որ ներդրումից անցել է ավելի քան երկու տարի, և որևէ պայմանագիր կամ գործունեության ապացույց չկա, ֆոնդը դեռևս քայլեր չի ձեռնարկում մոտ 4 միլիոն դոլարի ներդրումը հետ ստանալու ուղղությամբ։ Սա տարակուսանք է առաջացնում՝ հաշվի առնելով նմանատիպ իրավիճակում այլ ընկերության նկատմամբ կտրուկ գործողությունները։
Երևանում խուլիգանական վարք դրսևորելու կասկածանքով ձերբակալվել է լեհական ակումբի 17 երկրպագու
Դաշտ են դուրս գալիս ձեւիստները
Ում դրոշը պետք է երեւա սահմանի այն կողմում
Քաղաքապետարանի ավտոբուսների մասնակցությամբ ամեն 2-րդ վթարի մեղավորը ավտոբուսի վարորդներն են
Բեմ են դուրս գալիս «սոցիոլոգները»
Երևան-Մոսկվա չվերթի ինքնաթիռում ոչ ադեկվատ վիճակում գտնվող ուղևորը ձերբակալվել է
Հայրն իր կյանքի գնով փրկել է խեղդվող որդուն
200.000 դոլար՝ միջնորդության և 23.000 դոլար՝ կառուցապատման թույլտվության համար. Աղազարյանի գործը դատ...
61 միլիոն եվրո․ Մբապեն դատարանում հաղթել է ՊՍԺ–ին
ՍԱՏՄ-ն անհայտ ծագման միս է առգրավել ու ուղարկել ոչնչացման (տեսանյութ)