էրեբունու Սուրբ Մեսրոպ եկեղեցին համայնքում խաչերթ կանցկացնի

«Սրբազան Հայաստան» Նախաձեռնության տարածած հայտարարության մեջ ասվում է. «Սիրելի՛ եղբայրներ և քույրեր,

Հոկտեմբերի 12-ին Հայ Առաքելական եկեղեցին նշում է Սուրբ Թարգմանչաց տոնը, որը խորհրդանշում է հայոց գրերի գյուտը, Աստվածաշնչի հայերեն առաջին թարգմանությունը, թարգմանչաց շարժումն ու հայ դպրության սկիզբը։ Հայ առաքելական եկեղեցին «Սրբոց թարգմանչաց վարդապետացն մերոց» անվան ներքո տոնում է հայ թարգմանչաց տոնը` ի հիշատակ Մեսրոպ Մաշտոցի և նրա աշակերտների։

էրեբունու Սուրբ Մեսրոպ եկեղեցին կրում է Մեսրոպ Մաշտոցի անունը, ուստի այս տոնի կապակցությամբ սիրով հրավիրում Է հավատավոր ժողովրդին` միանալու իրենց նախաձեռնած միջոցառումներին։

Հոկտեմբերի 11-ին երեկոյան ժամը 17:00-ի ժամերգությունից հետո ժամը 18:00-ին նշվելու է նախատոնակը, որի շրջանակում էրեբունի համայնքում կիրականացվի Խաչերթ։

Հոկտեմբերի 12-ին ժամը 10:30 կմատուցվի Սուրբ Պատարագ` ի հիշատակ Սրբոց Թարգմանչաց։ Տեղի կունենա մատաղի օրհնության կարգ։

Սա հրաշալի առիթ է հայտնապես վկայելու մեր հավատքն առ Տեր Հիսուս Քրիստոս, միասիրտ աղոթքով խնդրելու մեր սիրո ու հավատքի նորոգումը մեր կյանքում:

Մեր փրկությունը միայն Աստծուց է: Խաչերթը Քրիստոսի` դեպի Գողգոթա անցած ճանապարհի խորհուրդն ունի նաև: Տերն ասաց. «Եթէ մէկը կամենում է հետեւել ինձ, թող ուրանայ իր անձը, վերցնի իր խաչը եւ գայ իմ յետեւից» (Մատթ. 16:23):

Խաչերթը կմեկնարկի ժամը 18:00 Սուրբ Մեսրոպ եկեղեցուց։

Հիշենք՝ մեր Տեր և Փրկիչ Հիսուս Քրիստոսն ասում է.

«Եթէ ձեզնից երկուսը միաբանուեն երկրի վրայ որեւէ խնդրանքի համար, ինչ էլ որ խնդրեն, կը կատարուի նրանց համար իմ Հօր կողմից, որ երկնքում է. որովհետեւ ուր երկու կամ երեք հոգի հաւաքուած լինեն իմ անունով, այնտեղ եմ ես, նրանց մէջ» (Մատթ. 18:19-20)»։