Չարենցավանում ուժեղ քամու հետևանքով գովազդային սյան վրայից պոկվել ու կախվել է հսկայական երկաթե ցուցանակը

Օգոստոսի 25-ին, Երևան-Սևան ավտոճանապարհի՝ Չարենցավանի վարչական տարածքում ուժեղ քամու հետևանքով երկաթե գովազդային սյան վրայից պոկվել ու կախվել է հսկայական երկաթե ցուցանակը։ Այս մասին հայտնում է shamshyan.com–ը։

Կայքի տեղեկություններով, ՀՀ ՆԳՆ Ոստիկանության Պարեկային ծառայության աշխատակիցներն ու Չարենցավանի հրշեջ-փրկարարական ջոկատի փրկարարները, ելնելով քաղաքացիների անվտանգությունից, մոտ 14 ժամ հերթապահություն են իրականացրել վնասված ցուցանակի մոտ՝ թույլ չտալով, որ այն ընկնի մեքենաների վրա։

Կայքի տեղեկություններով, պարեկային ծառայությունը փորձել է պատասխանատուներից ճշտել, թե որ կառույցն է այն ապամոնտաժելու, սակայն չէր հաջողվում։

Կայքի տեղեկություններով, այդ կառույցները Տարածքային կառավարման և ենթակառուցվածքների նախարարության «Ճանապարհային դեպարտամենտ», Կոտայքի մարզպետարան և Կոտայքի մարզում գործող հյուրանոցային համալիրներից մեկի սեփականատերերն են, ովքեր պատասխանել են՝«ով տեղադրել է, նա էլ պետք է ապամոնտաժի»։