Հիմա էլ ՌԴ խանութներում վաճառվող հայկական կոնյակների 90 տոկոսն «անվտանգ» չէ

Ռուսաստանյան խանութներում վաճառվող հայկական կոնյակների 90 տոկոսն «անվտանգ» չէ, արտադրանքի մոտ կեսը պարունակում է ոչ խաղողի սպիրտ, նշվել է «Հակակոնտրաֆակտ» միջազգային ասոցիացիայի եւ Կոնյակ, սպիրտ եւ ալկոհոլային արտադրանք արտադրողների միության համատեղ հետազոտությունում, տեղեկացրել է ՏԱՍՍ-ը։

Նշվել է, որ հետազոտության համար ձեռք են բերվել կոնյակի տարբեր ապրանքանիշերի 200 նմուշներ տասը հայ խոշոր արտադրողներից։ Նմուշները ձեռք են բերվել դաշնային առեւտրային ցանցերում եւ հանձնվել ուսումնասիրության Համառուսաստանյան ԳՀԻ անկախ լաբորատորիայում։

«Դրանցից 177-ում, այսինքն՝ 89 տոկոսում, 10 նմուշներից 9-ում հայտնաբերվել են խախտումներ։ Կեսում հայտնաբերվել են ոչ խաղողի սպիրտներ։ Եվ միայն 23 նմուշներն են լիովին համապատասխանել ԳՕՍՏ-ին եւ ՌԴ օրենսդրությանը»,- նշվել է հետազոտությունում։

«Հակակոնտրաֆակտ» ասոցիացիան դիմել է գլխավոր դատախազություն եւ «Ռոսալկոհոլտաբակկոնտրոլ»՝ խնդրելով լրացուցիչ վերահսկման միջոցներ ձեռնարկել Հայաստանի Հանրապետությունից ներկրվող ալկոհոլային արտադրանքի համար՝ նկատի ունենալով այն, որ ներկրվող բեռը տարանցվում է Վրաստանի Հանրապետությունով, եւ միջոցներ ձեռնարկել շրջանառության սահմանափակման համար մանրամեծածախ ցանցերում։ Դիմումների պատճենները կան ՏԱՍՍ-ի տրամադրության տակ։

Հիշեցնենք, որ Հայաստանը կոնյակի խոշոր մատակարարն է Ռուսաստան 2023 թվականից։ «Ռոսալկոհոլտաբակկոնտրոլ»-ի ղեկավար Իգոր Ալյոշինի Դաշնային խորհուրդ ներկայացրած զեկուցման համաձայն՝ Հայաստանի բաժինը այդ խմիչքի ներկրման մեջ կազմել է 61,7 տոկոս։