Մոսկվան արդեն ձևավորել է իր փորձագիտական ​​թիմը՝ Երևանին և Բաքվին սահմանազատման հարցում խորհրդատվական օգնություն ցուցաբերելու համար

Ռուսաստանն ակնկալում է, որ մոտ ապագայում հնարավոր կլինի գործնական աշխատանք սկսել հայ-ադրբեջանական սահմանի սահմանազատման ուղղությամբ։ Այս մասին չորեքշաբթի կայացած ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան։

«Մենք հետևողականորեն հանդես ենք գալիս Ռուսաստանի խորհրդատվական աջակցությամբ հայ-ադրբեջանական սահմանի սահմանազատման և դրա հետագա սահմանագծման հարցերով երկկողմ հանձնաժողովի ստեղծման օգտին»,- ընդգծել է Զախարովան։

Միևնույն ժամանակ, նրա խոսքով, պետք է քայլեր ձեռնարկվեն սահմանին կայունության և անվտանգության մակարդակը բարձրացնելու ուղղությամբ։

ՌԴ ԱԳՆ պաշտոնական ներկայացուցիչը նշել է, որ այս հարցը քննարկվել է Դուշանբեում Հայաստանի, Ռուսաստանի և Ադրբեջանի արտգործնախարարների եռակողմ հանդիպման ժամանակ։

«Գործընկերները հայտնել են, որ մոտ են ազգային պատվիրակությունների կազմավորման ավարտին»,- ասել է Զախարովան՝ հավելելով, որ Ռուսաստանն արդեն ձևավորել է իր փորձագիտական թիմը։

Ռուսաստանի Դաշնության արտաքին գործերի նախարարության պաշտոնական ներկայացուցչի տեսակետով՝ սահմանների սահմանազատման հանձնաժողովի աշխատանքների վաղաժամ մեկնարկը նաև պահանջվում է ցանկացած տեսակի սահմանային միջադեպեր կանխելու համար։

«Դրա շրջանակներում հնարավոր կլիներ վստահության բարձրացման մեխանիզմներ ձևավորել, այդ թվում՝ շփման խմբերի ստեղծում՝ սահմանային շրջաններում կայուն իրավիճակ ապահովելու համար»,- ասել է Զախարովան։