Մենաշնորհ կա, որն էլ բնականաբար խանգարում է մարդկանց ներդրումներ կատարել . ԱՄՆ-ում բնակվող հայ

Հայաստանում մենաշնորհ կա, որն էլ բնականաբար խանգարում է մարդկանց ներդրումներ կատարել: Այս մասին այսօր՝ սեպտեմբերի 18-ին, Հայաստան-Սփյուռք 6-րդ համաժողովի ժամանակ լրագրողների հետ զրույցում ասաց ԱՄՆ հայ համայնքի ներկայացուցիչ Ստեփան Հովակիմյանը:

Նրա խոսքով, Հայաստանի իշխանությունները պետք է նախ եւ առաջ մինիմալ պայմաններ ապահովեն, որ համալսարանն ավարտած մասնագետները ստիպված չլինեն արտագաղթել: Ստեփան Հովակիմյանը համաձայն է դիտարկմանը, թե շատերն արտագաղթում են նաեւ սոցիալական անարդարության պատճառով:

«Դժվարություններ կան, որոնք պետք է մատնացույց անել ու լուծումներ առաջարկել, ոչ թե գալ համաժողովի, խոսել ու հեռանալ, անհրաժեշտ է լուծումներ առաջարկել: Ինքս 30 տարի է՝ պետական պաշտոնյա եմ: Հասարակ օրինակ՝ միայնակ մայրերը պետական օժանդակություն են ստանում, իսկ Հայաստանում նման բան չկա: Մեկ այլ օրինակ, եթե ուզես Հայաստանում շաքարի բիզնեսով զբաղվել, չես կարողանա, որովհետեւ գալու ես, շաքարդ դնես 9 դրամ, շաքար ներկրողը կանչի ու քեզ ասի՝ քո գործն այստես մի դիր: Սա նշանակում է՝ մենաշնորհ կա: Սիրիայում էլ է այդպես. ով նախագահի շրջապատից է, հնարավորություններն ավելի շատ են»,- ասաց Ստեփան Հովակիմյանը:

NEWS.am