Մեծ Բրիտանիայում ֆիթնես սրահ են բացել, որտեղ մարզվում են առանց հագուստի

Բրիտանացի անհատական մարզիչ Հելեն Սմիթը մարզումների յուրահատուկ համակարգ է մշակել, որոնց ժամանակ մարդիկ ֆիզիկական վարժություններ են անում առանց հագուստի։ Մերկ պարապմունքներն ընթանում են շրջանային մարզումների ոճով եւ տեւում են 1 ժամ։ Վարժությունները ներառում են ցատկ, կքանիստ, ձգում եւ զույգերով աշխատանք։

Հելենի դասարանում առաջին դասն արդեն կայացել է։ Բրիտանական լրատվամիջոցները հայտնում են, որ դրան մասնակցել է մինչեւ 70 տարեկան 33 մարդ։ Հետագա պարապմունքները պլանավորվում է անցկացնել ամսական մեկ անգամ։ Մեկ պարապմունքի գինը 8 ֆունտ է։

Սմիթի խոսքով՝ իր համակարգն ինչ–որ բանով հիշեցնում է մարզական ճամբարների ոճը, սակայն ավելի մեղմ ձեւով։ Հելենին նման համակարգ ստեղծելու է ոգեշնչել Ֆրանսիայում նուդիստների հետ ծանոթությունը։ Հագուստից հրաժարվելը, ըստ մարզչի, պարապմունքներն ավելի արդյունավետ է դարձնում։

«Երբ մարզումներն ընթանում են առանց հագուստի, մարզվողներն ավելի լավ են տեսնում, թե ինչ է անում մարզիչը։ Օրինակ՝ եթե մարդը «շերտաձող» (պլանկա) վարժությունն է կատարում հագուստով, դժվար է հասկանալ, թե ճիշտ է արդյոք նա անում, եւ մկանները ճիշտ ձեւով են աշխատում։ Բացի այդ, մերկ մարզումներից հետո կարիք չկա մտածել քրտնած հագուստը լվանալու մասին», – ասել է Հելենը։

Ընդ որում, պարտադիր չէ մարզումներին ներկա լինել մերկ վիճակում։ Կանայք կարող են սպորտային կրծկալ կրել։ Թույլատրվում է նաեւ մարզակոշիկ հագնել։

news.am