Ադրբեջանցիները Շուշին դարձնելու են «ուխտավայր». Դավիթ Բաբայանը` այնտեղ կատարվողի մասին

Արցախի ԱԳ նախարարի խոսքով՝ կրակոցներով ադրբեջանցիները նպատակ ունեն թերահավատություն սերմանել մեր մեջ՝ մեր ապագայի հանդեպ։

Ադրբեջանցիները Շուշին դարձնելու են «ուխտավայր» տարբեր կատեգորիաների համար։ Sputnik Արմենիայի հետ զրույցում նման կարծիք հայտնեց Արցախի արտաքին գործերի նախարար Դավիթ Բաբայանը։

«Դեսպաններ, միջազգային կազմակերպություններ, ներքին լսարանի համար՝ մշակութային փառատոններ, երգիչներ, հերոսներ, մարզիկներ... Բոլորին բերելու են այնտեղ, որովհետև դա իրենց քարոզչամեքենայի մի մաս է՝ ցույց տալ, որ սա իրենցն է, փորձել ինչպես իրենց ոգի հաղորդել, այնպես էլ մեզ դրանով վհատեցնել»,- նշեց Բաբայանը։

Ինչ վերաբերում է Արցախում ադրբեջանական կողմից ժամանակ առ ժամանակ արձակվող կրակոցներին, Բաբայանի խոսքով, ադրբեջանցիները նպատակ ունեն «տարբեր կրակոցներով թերահավատություն սերմանել մեր մեջ՝ մեր ապագայի հանդեպ»։