Սահմանադրական նոր կարգը կարող է պառակտել Թուրքիան

Թուրքիայի ընդդիմադիր Ժողովրդահանրապետական կուսակցության առաջնորդ Քեմալ Քըլըչդարօղլուն հայտարարել է, որ խորհրդարանի ընդունած սահմանադրական փոփոխությունների փաթեթը, որը ներառում է նաև կառավարման նախագահական համակարգի անցման առաջարկ, կարող է պառակտել երկիրը: Այս մասին գրում է թուրքական «Միլլիյեթ» պարբերականը:

«Սահմանադրական նոր կարգը կարող է բաժանել Թուրքիան, մասնատել, կարող է ներքին բախում առաջանալ», - ասել է Քըլըչդարօղլուն:

Քեմալականների առաջնորդը ևս մեկ անգամ կոչ է արել բոլորին սպասվելիք հանրաքվեի ժամանակ «ոչ» քվեարկել և չաջակցել իշխող կուսակցության կործանարար նախագծին:

«Կարևոր չէ, թե ինչ քաղաքական նախընտրություններ ունեք: Իր երկիրը սիրող, ժողովրդավարության ու ազատության կողմնակից հանդիսացող յուրաքանչյուր մարդ պետք է «ոչ» քվեարկի», - հայտարարել է Քըլըչդարօղլուն:

Հիշեցնենք, որ հունվարի 21-ին Թուրքիայի խորհրդարանը ձայների մեծամասնությամբ հավանություն է տվել Սահմանադրությունում փոփոխությունների իրականացման փաթեթին, որն առաջարկում է անցում կատարել կառավարման նախագահական համակարգին: 18 հոդվածից բաղկացած օրենքի ընդունմանը կողմ է քվեարկել 339 պատգամավոր: Այնուհետ օրենքը կդրվի հանրաքվեի, ինչից հետո էլ կկայացվի վերջնական որոշում:

tert.am