Ապրանքները շարունակելու են թանկանալ. եթե այս իշխանությունը շարունակի մնալ

Կենտրոնական բանկը նշում է, որ Հայաստանում գնաճն ավելանալու է, հետևաբար, ՀՀ բնակչության կենսամակարդակն ընկնելու է: Ապրանքները շարունակելու են թանկանալ, իսկ ԿԲ-ի կանխատեսումներից երևում է, որ գոնե կարճաժամկետ կտրվածքով գնաճը 5,3 տոկոսի սահմաններում է լինելու, բայց հետագայում, ինչ-որ անհասկանալի լավատեսական կանխատեսումներով պայմանավորված՝ կարծում են, որ գնաճը կվերադառնա 4 տոկոսի սահման, այսինքն՝ այն սահման, որը նրանք օրենքով պետք է պահեն:

Այս մասին Tert.am-ի հետ զրույցում ասաց ՀՅԴ ԳՄ անդամ, գյուղատնտեսության նախկին նախարար Արթուր Խաչատրյանը՝ խոսելով ԿԲ-ի «Գնաճի հաշվետվություն (Դրամավարկային քաղաքականության ծրագիր առաջին եռամսյակ 2021թ. Դրամավարկային քաղաքականության 2020թ. IV եռամսյակի ծրագրի կատարման հաշվետվության մասին, ըստ որի, Հայաստանում պահպանվում է գնաճային սպասումների զգալի ավելացումը: «Բայց, եթե սցենարները նայենք, ապա նրանց կիրառած «հովհարային գծանկարով» մինչև 8 տոկոս գնաճ կարող է լինել: Նրանք, սա հիմնավորում են դոլարի արժևորմամբ և համավարակով պայմանավորված համաշխարհային միտումներով, բայց ես կարծում եմ, որ տեղի ունեցողը նաև այլ բացատրություն ունի: Ըստ պաշտոնական թվերի՝ մենք ունենք տնտեսական ակտիվության ցուցանիշի անկում 6,7 տոկոսի չափով և ունենք արտաքին առևտրաշրջանառության նվազում, ներմուծումը նվազել է շուրջ 13,6 տոկոսով: Սա նշանակում է, որ Հայաստանում ապրանքն ավելի քիչ է արտադրվում, քան նախորդ տարիներին և Հայաստան ավելի քիչ ապրանք է ներմուծվում, քան նախորդ տարիներին: Ստացվում է, որ մենք նաև ունենք ապրանքային դեֆիցիտ և դեֆիցիտով պայմանավորված գնաճ»,-ներկայացրեց Խաչատրյանը: Դիտարկմանը, թե էկոնոմիկայի նախարար Վահան Քերոբյանը հայտարարել էր, որ Հայաստանի տնտեսությունը համարյա վերականգնվել է, Խաչատրյանն արձագանքեց՝ այս հայտարարությունն իրականության հետ որևէ ընդհանրություն չունի: «Անգամ նրա բերած մաթեմատիկական հաշվարկն է անլուրջ: Իսկ լավատեսական հիմնավորումներ անելիս, թե երկնիշ տնտեսական աճ է լինելու՝ նա հաշվի չի առնում, որ իր մենք աղետալի պարտություն ենք կրել և մինչ օրս առկա է կորոնավիրուս: Երկու կարևոր հարցերը հաշվի չառնելով՝ ինչպե՞ս է նա կարողանում տնտեսական աճ կանխատեսել»: Հարցին, թե արդյո՞ք էկոնոմիկայի նախարարն ու Կենտրոնական բանկը չեն քննարկել այս հարցերը, որ հիմա ականատես ենք լինում երկու հակասական հայտարարությունների՝ վերջինս պատասխանեց, որ ԿԲ-ի կանխատեսումները տնտեսական աճի հետ կապված շուրջ 7 անգամ տարբերվում է Քերոբյանի լավատեսական կանխատեսումներից: «Ինձ ավելի շատ հետաքրքրում է, թե էկոնոմիկայի և Ֆինասների նախարարները, փոխվարչապետը միասին այս հարցը քննարկում են, թե ոչ, քանի որ անցած տարի դեկտեմբերին Քերոբյանն առաջարկել էր տնտեսական զարգացման իր մոտեցումը պետական ներդրումների հետ կապված, դրան դեմ էին քվեարկել ֆինանսների նախարարը, փոխվարչապետ Մհեր Գրիգորյանը, աշխատանքի և սոցիալական հարցերի նախարար Մեսրոպ Առաքելյանը: Այսինքն, Կառավարությունում նրանք անգամ միմյանց հետ կարևոր հարցեր չեն քննարկում կամ ընդհանուր մոտեցում չունեն, ուր մնաց էկոնոմիկայի նախարարն ու Կենտրոնական բանկն այս հարցում համաձայնեն»: Խոսելով գնաճի ֆոնին հասարակության վիճակի մասին՝ Խաչատրյանը նշեց, որ 5 տոկոս սղաճի ֆոնի վրա, գոնե պաշտոնական տվյալներով, աշխատավարձերի բարձրացումը կազմել է 0,8 տոկոս, ինչը չի կարող չհանգեցնել կենսամակարդակի վատթարացման:

«Եթե այս իշխանությունը շարունակի մնալ, եթե այս հանցավոր քաղաքական խմբակը շարունակի իշխել Հայաստանը և տնտեսական քաղաքականության մեջ փոփոխություն չտեսնենք, ապա մենք կունենանք բավականին ծանր տնտեսական իրավիճակ, մարդկանց բարեկեցությունն էապես կնվազի և նրանք, ովքեր ասում էին՝ թող հացը դառնա 1000 դրամ, բայց Փաշինյանը շարունակի վարչապետ մնալ, իրենց նպատակն իրականացված կտեսնեն»: «Այս Կառավարությունն իր վարչապետի գլխավորությամբ ասում էր, որ Հայաստանն ագրարային պետությունից պետք է դարձնենք զարգացած արդյունաբերական երկիր, ոչնչացրեց գյուղատնտեսության նախարարությունը, միավորեց այն Էկոնոմիկայի նախարարությանը։ Այսօր հույսն էլի դրել է գյուղատնտեսության վրա: Կարծում եմ՝ իշխանականներին սա պետք է հուշի, որ նրանք հերթական սխալն էին գործել»,-նշեց նա:

Արթուր Խաչատրյանը շեշտեց, որ այս իշխանությունը տնտեսական զարգացման հեռանկարը կապում է Թուրքիայի և Ադրբեջանի հետ, որի ապացույցն է վերջին շրջանում վարչապետի, Տավուշի մարզպետի, ԱԽ քարտուղարի հայտարարությունները: «Օրվա իշխանությունը թուրքական օրակարգն է առաջ տանում՝ ենթակառուցվածքային ձախողված ծրագրերը գովազդելով: Ինչպե՞ս կարող էր թուրքը, ով 6 ամիս առաջ մեր դեմ կռվում էր Արցախում, այսօր օգնի, որ զարգանանք: Ի՞նչ է, 6 ամիս առաջ թշնամի էին, հիմա դարձան բարեկամ»: