Սկզբում մտածում են քանդելու մասին, իսկ հետո նոր սարքելու. Որտե՞ղ են երաշխիքները, որ ակադեմիական քաղաք կկառուցվի

Առաջին հայացքից ակադեմիական քաղաքի գաղափարը հետաքրքիր է, բայց Հայաստանի պարագայում ուղղակի ծիծաղելի է։ «Փաստինֆո»-ի հետ զրույցի ժամանակ այս մասին ասաց Գիտությունների ազգային ակադեմիայի գիտակրթական միջազգային կենտրոնի դեկան, կրթության ոլորտի փորձագետ Ատոմ Մխիթարյանը՝ անդրադառնալով վարչապետի հայտարարությանը։

Նշենք, որ ՀՀ վարչապետ Նիկոլ Փաշինյանն Արմավիրի մարզ կատարած այցի ժամանակ ասել է, որ գաղափար ունեն Երևանի բուհերի շենքերը վաճառել և ստացված գումարով Երևանից դուրս ակադեմիական քաղաք կառուցել։

Փորձագետը նկատեց՝ հայտարարում են, որ անհրաժեշտ է Երևանում համալսարանների շենքերը վաճառել և դրանից հետո մտածել այդ ակադեմիական քաղաքի կառուցման մասին, իսկ որտե՞ղ են երաշխիքները, որ նման քաղաք կկառուցվի։ Ակադեմիական քաղաքներ կան ամբողջ աշխարհում, որտեղ հավաքվում են գիտնականներ, դասախոսներ, ուսանողներ։ Այնտեղ ապահովվում է ակադեմիական այն միջավայրը, որտեղ հնարավոր է ավելի մեծ արդյունքներ գրանցել։ Ատոմ Մխիթարյանի խոսքով գաղափարը շատ դրական է, բայց Հայաստանի պարագայում դա անիրականանալի է, քանի որ մեծ ներդրումներ է պահանջում.

«Նույնիսկ այն շենքերը, որոնք պետք է վաճառվեն, դրանց գումարը չի բավականացնի, որպեսզի այդպիսի մեծ կամպուս ունենանք Հայաստանում, թեկուզ մեկ հատ։ Այսինքն` սա առանց գնահատելու հայտարարություն է և պետք է մանրամասն մշակվի, ռազմավարական ծրագրի վերածվի, բյուջետավորվի և հետո նոր իրականություն դառնա։ Դրա համար տասնյակ տարիներ են անհրաժեշտ»,-նշեց Ատոմ Մխիթարյանը։

Նրա խոսքով արտահերթ ընտրություններն են մոտենում և բուհերում կենտրոնացած մտավորականության, գիտական հասարակության ձայները շահելու համար է նման հայտարարություն արվում, բայց Ատոմ Մխիթարյանը վստահ է՝ մտավորականությունն այդ խայծը կուլ չի տա։

«Նաև կարևոր է, թե գաղափարն ով է ասում։ Եթե այնպիսի մարդ է ասում, որն այդ ամեն ինչի մեջով անցել է և պատկերացնում է դրա կարևորությունը, սա մի բան է, իսկ եթե դա ասում է մարդ, որը բարձրագույն կրթություն չունի, սա լրիվ այլ բան է՚,-ասաց փորձագետը։
Ատոմ Մխիթարյանը վարչապետին և նման ծրագրի շուրջ մտածողներին առաջարկում են առանց բուհերը քանդելու կամ կազմաքանդելու սկսել այդ ակադեմիական քաղաքի շինարարությունը և կազմավորումը.

«Այն ժամանակ, երբ կունենանք այդ քաղաքն իր ենթակառուցվածքներով և մնացած հնարավորություններով, պետք է պայմաններ ստեղծեն, որ այն դասախոսները, որոնք կցանկանան աշխատել այդ միջավայրում տեղափոխվեն։ Ոչ թե սա քանդեն, որ հետո սարքեն։ Այս կառավարության ձեռագիրն է՝ սկզբում մտածում են քանդելու մասին, իսկ հետո նոր սարքելու»,-նշեց փորձագետը։

Վերջինս ընդգծեց՝ գաղափարը լավն է, սակայն եթե լավ գաղափարն ասում է այնպիսի մարդ, որը վարկաբեկված է, գաղափարը նույնպես վարկաբեկվելու է ու չկարողանան այդ նույն բանն իրականացնել. «Ավելի լավ է ձեռնպահ մնալ նման բաներից և չխոսեն այն մարդիկ, որոնք դրանից գաղափար չունեն»,-եզրափակեց Ատոմ Մխիթարյանը։