Սահմանափակումները միայն ազդել են մարդկանց նյարդային վիճակի վրա. սրճարաններում, ռեստորաններում 40 հոգով իրար չեն վարակում, իսկ փողոցում ասում են՝ դիմակ կրեք

Համավարակի երկրորդ ալիքի սկսելու կանխատեսումներին շատ կասկածանքով եմ մոտենում, որովհետև երկրորդ ալիքի սկսման մասին հայտարարում էին դեռևս մարտի վերջերին, ապրիլի սկզբին, ինչպե՞ս էին կռահում, երբ ամբողջ աշխարհում առաջին ալիքը չէր նահանջել, այնպես որ, դա ինձ համար արհեստական է, հատկապես, որ դրա մասին խոսում էին քաղաքական գործիչները և ԱՀԿ –ի ներկայացուցիչները. Tert.am-ի հետ զրույցում նշեց բժշկական գիտությունների դոկտոր, պրոֆեսոր Պետրոս Անանիկյանը:

Բժիշկը ասում է, որ հիմա թեստավորում ավելի շատ է իրականացվում, բայց, իր կարծիքով, Հայաստանում շատերն են հիվանդացել և լավացել հունվար, փետրվար և մարտ ամիսներին և հնարավոր է դա է պատճառը, որ հիմա վարակակիրների թիվը նվազել է:

«Միանշանակ հիմա վարակի աճ չկա, ինձ թվում է ամեն ինչ գնում է նվազման:Ես համարում եմ, որ մեր մոտ չնայած բոլոր տանջանքներին՝ կորոնավիորուսը նահանջում է»,- նկատեց նա:

Դիտարկմանը, թե արդյոք կիրառված հակահամաճարակային սահմամափակումները նպաստեցի՞ն վարակի նվազեցմանը, Պետրոս Անանիկյանը պատասխանեց.

«Սահմանափակումները, որ իրականացվել են, միայն ազդել է մարդկանց ներվային վիճակի վրա, ես ասել եմ, որ չեմ պատկերացնում, ինչպե՞ս է կաֆեներում, ռեստորաններում մարդիկ նստած են 40 հոգով իրար չեն վարակում, իսկ փողոցում, որ անհնար է վարակվել, եթե հատուկ չփռշտան երեսին, ասում են դիմակ կրեք» :

Դիտարկամնը `թե հնարավո՞ր է դպրոցների բացումը նպաստի վարակի ուժգնացմանը, բժիշկը նշեց, որ դպրոց գնացող երեխաներին, հնարավորության դեպում լավ կլինի ստուգեն, թե տանը հիվանդ կա թե ոչ և բացի այդ, պետք է հաշվի առնել, որ երեխաների 90 տոկոսը հիվանդությունը հեշտ են հաղթահարում:

«Ես համարում եմ անհնար է, որ 4 ժամ երեխան դիմակ դնի և միտքը ո՞րն է դպրոց գնալու, եթե պետք է գրատախտակին չմոտենա, կամ դասատուն դիմակով խոսի, աբսուրդ է, այդ դեպքում ավելի լավ է հեռավար պարապեին: Բայց ամեն դեպքում պետք է նշեմ, որ սա գրիպի էպիդեմիա է, որը ամեն տարի ունեցել ենք և պետք չէ այդքան շատ սարսափել»,- ասաց բժիշկը:

Դիտարկմանը թե՝ Ձեր մտահոգությունն եք հայտնել վարակի կանխարգելման շուրջ տարվող միջոցառումների վերաբերյալ, հիմա իրավիճակը գնահատելով, ի՞նչ խնդիրներ եք տեսնում, Պետրոս Անանիկյանը պատասխանեց.«Ես անհամբեր սպասում եմ, թե առողջապահության նախարարը, երբ է վերադառնալու արձակուրդից, միգուցե, հանգստանալուց հետո նոր եռանդով կպնի գործին»: