Նևրոզների կլինիկան հաջորդ տարի պետպատվեր չի ստանա, և նախագիծը չընդունվելու դեպքում կգնա լուծարման

ՀՀ ԱԺ տնտեսական հարցերի մշտական հանձնաժողովը քննարկեց «Պետական գույքի մասնավորեցման 2017-2020 թվականների ծրագրի մասին» օրենքում փոփոխություններ կատարելու օրենքի նախագիծը: Հանձնաժողովի նախագահ «Իմ քայլը» խմբակցության պատգամավոր Բաբկեն Թունյանը տեղեկացրեց, որ նախագիծը վերաբերում է նրան, որ այս օրենքի փոփոխությամբ առաջարկվում է կառավարությանը հնարավորություն տալ, որ առողջապահական պրոֆիլի հիմնարկների ժամանակ կառավարությունն ինքը որոշի, թե դա պահպանվում է, թե չի պահպանվում, քանի որ գործող կարգով առողջապահական պրոֆիլը պարտադիր պահապանվում է:

«Առաջին նիստում ասացինք, որ այս նախագիծը ԱԺ-ի դերը փաստացի նվազեցնում է և առաջարկեցինք երկու ամիս ժամկետով հետաձգել և գտնել ճկուն լուծում, սակայն նախագիծը թարմացված ձևով չի ներկայացվել և մեկ անգամ էլ ընդառաջ գնացինք և որոշեցիք քվեարկությունը հետաձգել: Հիմա մենք քննարկում ենք կարծես էլի նույն նախագիծը»,-ասաց նա:

Նախագծի զեկուցող, Պետական գույքի կառավարման կոմիտեի նախագահի տեղակալ Վարդան Կոստանյանը նշեց, որ թվով հինգ ընկերություններից չորսի դեպքում պրոֆիլի պահպանման խնդիր չկա և օրինակ` Նևրոզների կլինիկան պրոֆիլի պահպանման հետաքրքրություն չունի, և ներկայացնելու են մասնավորեցման, հակառակ դեպքում` գնալու է լուծարման, քանի որ մյուս տարի պետպատվեր չի լինելու: «Եթե չենք ընդունում այս նախագիծը, ապա գնալու ենք այս ընկերությունների լուծարման»,-ասաց նա:

Պատգամավորները հետաքրքրվեցին, թե ամեն դեպքում հիմնարկությունն աշխատո՞ւմ է օգուտով և հարցրին, թե ինչ է սպասվում աշխատակազմին: Վարդան Կոստանյանն ասաց, որ կոնկրետ Նևրոզների կլինիկան ունի մոտ 50 աշխատող: «Դժվարանում եմ պատասխանել, թե ինչ կլինի նրանց ճակատագիրը»,-ասաց նա և համաձայնեց, որ պետք է կոլեկտիվի մասին մտածել և նշեց, որ չեն թողնում բախտի քմահաճույքին:

«Նոր մասնավորեցման նախագիծ ենք շրջանառության մեջ դնում և ավելի լավ պայմաններ ենք առաջարկում ներդրողներին: Նևրոզների կլինիկայի բյուջեի 80-90 տոկոսը կախված է պետպատվերից և մրցունակ չի լինի այլ մասնավոր կազմակերպությունների հետ, եթե հանենք պետպատվերը»,-ասաց նա:

«Լուսավոր Հայաստան» խմբակցության պատգամավոր Արկադի Խաչատրյանը նշեց, որ կարծում է, որ ընդհանրապես այս հարցը պետք է զեկուցեր առողջապահության նախարարը՝ ներկայացնելով առողջապահության ոլորտի տվյալ ուղղության զարգացման ռազմավարությունը: «Պետպատվեր լինել-չլինելը չպետք է որոշվի պահի տակ` այս կամ այն կազմակերպության շահութաբերության, միջանձնային հարաբերություններից ելնելով»,-ասաց նա:

Հանձնաժողովի նախագահ Բաբկեն Թունյանը նշեց, որ ԱԺ ինստիտուտի նկատմամբ անհարգալից վերաբերմունք է կառավարության ամեն անգամ նույն նախագիծը ներկայացնելը, ինչը անընդունելի է և տեղեկացրեց, որ դեմ է քվեարկելու նախագծին: «Խնդիրն ավելի շատ աշխատանքը Ազգային ժողովի հետ ճիշտ կազմակերպելու մեջ է»,-ասաց նա:

Այսպիսով` նախագիծը դրվեց քվեարկության, մեծ մասը դեմ քվեարկեց, միայն մեկ հոգի կողմ և երեքը՝ ձեռնպահ, նախագիծը չընդունվեց: