Արսեն Բաբայանի նկատմամբ խափանման միջոց ընտրելու անհրաժեշտություն չկա. պաշտպանները դատարանին միջնորդություն ներկայացրին

Երեւան քաղաքի ընդհանուր իրավասության դատարանում այսօր՝ սեպտեմբերի 7-ին, Ազգային ժողովի նախկին նախագահ Արա Բաբլոյանի եւ ԱԺ աշխատակազմի ղեկավարի նախկին տեղակալ Արսեն Բաբայանի գործով ընթացող դատական նիստին Բաբայանի պաշտպաններ Լուսինե Սահակյանը եւ Երվանդ Վարոսյանը միջնորդություն ներկայացրին դատարանին՝ Բաբայանի նկատմամբ ընտրված խափանման միջոցը վերացնել։

Արսեն Բաբայանի պաշտպան Երվանդ Վարոսյանը նշեց, որ իր պաշտպանյալի նկատմամբ որեւէ խափանման միջոց ընտրելու անհրաժեշտություն չկա։ Հաշվի առնելով այն հանգամանքը, որ եղել է երաշախավոր, եղել են որոշակի դրամական միջոցներ են վճարվել եւ դրանք անիմաստ գտնվում են դատական դեպարտամենտի հաշվին։ 2018 թվականի հոկտեմբերին համաներման մասին որոշում է կայացրել ԱԺ-ն, դա առնվազն հաշվի առնելով, պարզ է, որ բացարձակապես անիմաստ է որեւէ խափանման միջոցի կիրառումը այս գործով ամբաստանյալների նկատմամբ։ Քննության խոչընդոտելու մասին առհասարակ չեմ ուզում խոսել, թաքնվելու մտադրություն նրանցից ոչ ոք չունի։ Այս գործով ցանկացած սահմանափակում հատկապես այս գործով առաջացնում է մարդու իրավունքների խախտում եւ ընտրված խափանման միջոցը այս պահի դրությամբ հիմնավոր չէ, անիմաստ է»։

Բաբայանի մյուս պաշտպան Լուսինե Սահակյանը միացավ ներկայացված միջնորդությանը։

«Ամեն ինչ արդեն կանխատեսելի է։ Եթե խոսքը վերաբերում է նաեւ նյութերին, ապա նյութերի մասով որեւէ փաստարկ չի կարող ներկայացվել եթե նկատի ունենանք, թե ինչպիսի գործ է քննվում ձեր վարույթում, անհասկանալի է, թե ինչ խոչընդոտելու մասին կարող է խոսք գնալ։ Կայացված որոշումն էլ խոսում է այն մասին, որ այս որոշումը չի կարող գործել։ Մենք հույս ունենք, որ կլինի օրինական դատական ակտ։ Խափանման միջոցն ընտրվելու պարտադիր պայմանը խափանման միջոցի պայմանն է և հիմքերը։ Երբ Բաբայանի նկատմամբ խափանման միջոց էր ընտրվում, լրիվ այլ մեղադրանք էր, այսինքն՝ լրիվ այլ պայման գոյություն ուներ»,- ասաց Սահակյանը։

Արա Բաբլոյանի պաշտպան Արամ Վարդեւանյանը նույնպես միացավ Բաբայանի պաշտպանների ներկայացրած միջնորդությանը։

Գործով մեղադրող դատախազն էլ առարկեց պաշտպանների ներկայացրած միջնորդության դեմ. «Արսեն Բաբայանի նկատմամբ անձնական երաշխավորությունը տրվել է այն ժամանակ, երբ նրա նկատմամբ խափանման միջոց է եղել կալանքը եւ մեր կողմից որոշում է կայացվել կալանքը փոփոխելու եւ անձնական երաշխավորություն կիրառել։ Այսինքն՝ այդ փուլում գնահատվել է, որ խափանման միջոց կիրառելու հիմքերն առկա են։ Գտնում եմ, որ դատաքննության ներկա փուլում դեռեւս չեն վերացել այդ հիմքերը։ Գտնում եմ, որ միջնորդությունն անհիմն է եւ ենթակա է մերժման»։

Դատարանը հեռացավ խորհրդակցական սենյակ. որոշումը կհրապարակի 17։30-ին։

Ըստ մեղադրական եզրակացության՝ Արա Բաբլոյանը 2018թ․ հանդիսանալով Հայաստանի Հանրապետության Ազգային ժողովի նախագահը, մշտապես իշխանության ներկայացուցչի գործառույթներ իրականացնող պաշտոնատար անձ չարաշահել է իր պաշտոնեական լիազորությունները, որն անզգուշությամբ առաջացրել է ծանր հետեւանքներ, ինչպես նաեւ կատարել է պաշտոնեական կեղծիք։

Ըստ մեղադրական եզրակացության՝ Արսեն Բաբայանը 2018թ․ մարտի 5-ին համատեղության կարգով հանդիսանալով Հայաստանի Հանրապետության ԱԺ աշխատակազմի ղեկավարի տեղակալի պաշտոնակատարը, օժանդակել է ՀՀ Ազգային ժողովի նախագահ Արա Բաբլոյանին եւ այլ պաշտոնակատար անձանց՝ իրենց պաշտոնեական լիազորությունները չարաշահելուն, որն անզգուշությամբ առաջացրել է ծանր հետրեւանքներ, ինչպես նաեւ կատարել է պաշտոնեական կեղծիք։

Արա Բաբլոյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ եւ 314-րդ հոդվածի 1-ին մասերով, իսկ Արսեն Բաբայանին` ՀՀ քրեական օրենսգրքի 38-308-րդ հոդվածի 2-րդ եւ 314-րդ հոդվածի 1-ին մասերով: