Ինչո՞ւ են կորոնավիրուսով վարակված պացիենտներին դուրս գրում մինչեւ լիարժեք ապաքինումը

Աննան կորոնավիրուսով վարակվել է հուլիսին: Նա ստացիոնարում 17 օր է մնացել, եւս 3 օր հյուրանոցում եւ եւս 15 օր բուժումը շարունակել է տանը: Նույնիսկ բուժումն ավարտելուց հետո նրան երկար ժամանակ անհանգստացրել է թուլությունն ու էներգիայի պակասը, եւ միայն վերջերս են նրա ուժերը վերականգնվել:

31-ամյա Աննան (պացիենտի անունը փոխված է իր խնդրանքով) NEWS.am Medicine-ին պատմեց, որ իր ինքնազգացողությունը հուլիսի սկզբին աստիճանաբար վատացել է, երկար ժամանակ ուշադրություն չի դարձրել թուլությանն ու հեւոցին: Մի անգամ զգացել է, որ դժվար է շնչում՝ տանը նույնիսկ թեթեւ աշխատանք անելով: Այդ ժամանակ նա դիմել է պոլիկլինիկա, սակայն ռենտգենը ոչինչ չի հայտնաբերել, եւ թերապեւտը տուն է ուղարկել՝ խորհուրդ տալով լավ հանգստանալ:

Սակայն հանգիստը չի օգնել, եւ Աննայի վիճակն էլ ավելի վատացել, այդ պատճառով մի քանի օր անց նա կրկին դիմել է պոլիկլինիկա: Այս անգամ նրան հակաբիոտիկներ են նշանակել: Սակայն այդ դեղերն ընդունելուց 7 օր անց ոչինչ չի փոխվել, Աննայի վիճակը գնալով վատացել է: Թուլությանն ու հեւոցին ավելացել է գլխացավն ու հազը: Մի անգամ գիշերը Աննան արթնացել շնչահեղձ լինելուց: Նա շտապօգնություն չի կանչել իր հարազատներին եւ երեխային չվախեցնելու համար:

Հաջորդ օրն առավոտյան Աննան դիմել է մասնավոր բուժկենտրոն: Թերապեւտն ուղարկել է թոքերի ԿՏ անելու: Պարզվել է, որ Աննայի մոտ երկկողմանի թոքաբորբ է: Եվ չնայած նրան, որ կորոնավիրուսի թեստը բացասական է եղել, բժիշկն ասել է, որ ամբողջական պատկերը ցույց է տալիս կորոնավիրուսի առկայությունը, եւ նա պետք է շտապ ստացիոնար բուժում ստանա:

Աննան վերադարձել է տուն, որպեսզի հավաքի իրերն ու հիվանդանոց գնա, սակայն տեսել է, որ իր որդին ծածկվել է տաք ձմեռային ծածկոցով: Նրա ջերմությունը հասել է 39-ի, եւ Աննան շտապօգնություն է կանչել: Նրան եւ որդուն տեղափոխել են «Արաբկիր» ԲԿ, որտեղ թեստ են անցկացրել, Աննայի թեստի պատասխանը դրական է եղել, երեխայինը՝ բացասական:

Նրանք 5 օր մնացել են ստացիոնարում եւ դեղորայք ընդունել, որից հետո երեխային դուրս են գրել, իսկ Աննային տեղափոխել «Սուրբ Գրիգոր Լուսավորիչ»:

Չնայած երիտասարդ տարիքին եւ քրոնիկ հիվանդությունների բացակայությանը՝ Աննան շատ ծանր է տարել կորոնավիրուսը: Նույնիսկ ստացիոնարում երկար ժամանակ չէր հաջողվում իջեցնել ջերմությունը, հազն էլ ավելի էր ուժեղանում, շնչառությունը՝ դժվարանում: Աննայի խոսքով՝ այդ օրերին նա դժվարությամբ էր ուժերը հավաքում, որպեսզի մի քիչ ջուր խմեր կամ ուտեր: Ավելին, որոշ դեղեր բացասաբար էին ազդում նրա սրտի վիճակի վրա:

Աննան 12 օր անցկացրել է «Սուրբ Գրիգոր Լուսավորիչում», որից հետո 3 օր՝ հյուրանոցում, իսկ հետո՝ տանը: Այդ ժամանակ Աննայի ինքնազգացողությունը դեռ լավ չի եղել, եւ ջերմությունը դեռ չի կարգավորվել: Սակայն նրան դուրս են գրել եւ ասել, որ բուժումը կարելի է տանը շարունակել:

«Կրկնակի ԿՏ եմ արել, որը ցույց է տվել, որ թոքերը դեռ լավ վիճակում չեն: Ես բժշկին հարցրեցի, թե արդյոք ես ապաքինված եմ համարվում, ինչին նա պատասխանեց, որ ես ապաքինվում եմ: Կորոնավիրուսի կրկնակի թեստ չարեցին, ասացին, որ դրա անհրաժեշտությունը չկա: Ես վախենում էին տուն վերադառնալ, քանի որ կարող էի վարակել ընտանիքիս մյուս անդամներին»:

Որոշ հետազոտությունների տվյալներով՝ առաջին ախտանիշների հայտնվելուց արդեն 10-14 օր անց կորոնավիրուսով վարակվածներն արդեն վարակիչ չեն շրջապատի համար, եւ նման պացիենտների հետագա բուժումը կարելի է կազմակերպել նաեւ ամբուլատոր պայմաններում, եթե պացիենտն իրեն լավ է զգում կամ էլ որեւէ լուրջ հիմք չկա նրան ստացիոնարում թողնելու համար:

Եվս 15 օր Աննան դեղորայք է ընդունել տանը: Նրա ինքնազգացողությունը վերջապես լավացել է, եւ այժմ նա գրեթե առողջ է: Նրա որդին եւս իրեն լավ է զգում, ընտանիքի մյուս անդամները կամ չեն վարակվել կամ էլ վարակն առանց ախտանիշների են տարել:

NEWS.am Medicine-ի թղթակցի հարցմանն ի պատասխան՝ առողջապահության նախարարությունից նշեցին, որ առողջապահության նախարարի 10.04.2020թ. թիվ 1239-Ա (http://www.moh.am/images/legal-550.pdf) հրամանի հավելված 4-ով հաստատված կարգի համաձայն` բժշկական կազմակերպություններից կորոնավիրուսային հիվանդությամբ պացիենտների դուրսգրումն իրականացվում է հիվանդության կլինիկական դրսեւորումների հետընթացի (ռեգրեսի) դեպքում` կլինիկական եւ ռադիոլոգիական չափանիշներին համապատասխան:

Միաժամանակ, կորոնավիրուսային հիվանդության կապակցությամբ բժշկական օգնություն եւ սպասարկում ստացող ծերանոցների եւ անօթեւանների ժամանակավոր կացարանների շահառուների, հեմոդիալիզային բժշկական օգնություն եւ սպասարկում ստացող պացիենտների, ինչպես նաեւ հիվանդանոցային պայմաններում բուժումը շարունակելու նպատակով այլ բժշկական կազմակերպություններ տեղափոխվող պացիենտների դուրսգրումն իրականացվում է ՊՇՌ հետազոտության կրկնակի բացասական արդյունքի դեպքում, որը կատարվում է պետության կողմից երաշխավորված բժշկական օգնության եւ սպասարկման ծավալների շրջանակներում:

Այս թեմայով Հայաստանի բնակչության 3 տոկոսը կորոնավիրուսի դեմ կպատվաստվի AstraZeneca-ի պատվաստանյութով Հայաստանում գրանցվել է կորոնավիրուսի 392 նոր դեպք Կորոնավիրուսով վարակման 374 նոր դեպք մեկ օրում Չգիտենք՝ մեր հարազատին ենք հուղարկավորել, թե ոչ․ ինչից են բողոքում COVID-19-ից մահացածների հարազատները (տեսանյութ) «Ես հասկացա, որ ոտքերիս տակ դրված տոպրակում իմ եղբայրն է, որին պետք է ճանաչեմ». Անահիտ Հարությունյան (տեսանյութ)