«Օրենքով գող» Արսեն Երևանսկին քիչ առաջ տեղափոխվել է քաղաքացիական հիվանդանոց.նրա վիճակը կտրուկ վատացել է

«Օրենքով գող» Արսեն Երևանսկին՝ Արսեն Մկրտչյանը քիչ առաջ տեղափոխվել է «Նաիրի» ԲԿ։ Այս մասին «Փաստինֆո»-ին հայտնեց պաշտպան Լուսինե Մարտիրոսյանը՝ նշելով, որ նրա վիճակը կտրուկ վատացել է։

Փաստաբանի փոխանցմամբ՝ նա մինչ այս պահը գտնվել է «Դատապարտյալների հիվանդանոց» ՔԿՀ-ում և համաձայն ստացված տեղեկանքի՝ Մկրտչյանի վիճակը ծանր է գնահատվել։

Պաշտպանը նաև տեղեկացրեց, որ Վերաքննիչ քրեական դատարանը՝ դատավոր Կարեն Մարդանյանի նախագահությամբ, մերժել է «Օրենքով գող» Արսեն Երևանսկու նկատմամբ կալանավորումը որպես խափանման միջոց ընտրելու մասին դատարանի որոշման դեմ պաշտպանների ներկայացրած վերաքննիչ բողոքը։

Ինչպես ավելի վաղ տեղեկացրել ենք՝ Մկրտչյանին մեղադրանք է առաջադրվել ՀՀ քրեական օրենսգրքի 223.2-րդ հոդվածի 2-րդ մասի 5-րդ մասով՝ քրեական աստիճանակարգության բարձրագույն կարգավիճակ ունեցող անձի կողմից քրեական ենթամշակույթ կրող խմբավորում ստեղծելու և ղեկավարելու հատկանիշներով, սակայն մեղադրանքը նա չի ընդունել։

Հիշեցնենք՝ մայիսի 22-ին ԱԱԾ-ն հայտարարեց, որ քրեական աստիճանակարգության բարձրագույն կարգավիճակ ունեցող անձի կողմից, քրեական ենթամշակույթ կրող խմբավորում ստեղծելու և ղեկավարելու հիմնավոր կասկածանքով 2020թ. մայիսի 21-ին ՀՀ ԱԱԾ քննչական դեպարտամենտ է բերման ենթարկվել «Արսեն Երևանսկի» մականունով Արսեն Մկրտչյանը և քրեական աստիճանակարգության բարձրագույն կարգավիճակ ունեցող անձի կողմից քրեական ենթամշակույթ կրող խմբավորմանը մասնակցելու կամ դրա հետապնդած նպատակների իրականացմանը ներգրավված լինելու կամ քրեական ենթամշակույթ կրող խմբավորման հավաքներ կազմակերպելու կամ դրանց մասնակցելու կասկածանքով՝ «Բասար» մականունով Արմեն Մելքոնյանը:

Բացի այդ, քրեական ենթամշակույթ կրող խմբավորման մասնակցին կամ քրեական աստիճանակարգության բարձրագույն կարգավիճակ ունեցող անձին դիմելու կասկածանքով բերման են ենթարկվել 8 անձ։