Մինչև հրաժարականիս դիմումը չստորագրվի, ես աշխատելու եմ, կառույցն անտեր չեմ կարող թողնել, գնալ. Սմբատ Գոգյան

Մինչև հրաժարականիս դիմումը չստորագրվի, ես, ամեն դեպքում, աշխատելու եմ, կառույցն անտեր չեմ կարող թողնել, գնալ: Այս մասին Tert.am-ի հետ զրույցում ասաց Բարձրագույն որակավորման կոմիտեի (ԲՈԿ) նախագահ Սմբատ Գոգյանը՝ անդրադառնալով դիտարկմանը, թե մամուլի հրապարակումների համաձայն՝ իշխանության տարբեր ներկայացուցիչներ դեմ են իր հրաժարականին և հույս ունեն՝ դիմումը չի ստորագրվի:

Նա ոչ հաստատեց, ոչ հերքեց լուրերը, որ հրաժարականի դիմումից հետո հանդիպել է վարչապետի հետ՝ նշելով, թե չի ցանկանում մեկնաբանել մամուլի հրապարակումները, և եթե ասելիք լինի, գրառում կկատարի:

Հարցին՝ իր հետ խոսակցություններ եղե՞լ են այլ պաշտոնի նշանակվելու մասին, Գոգյանը պատասխանեց. «Քանի դեռ ԲՈԿ-ի նախագահ եմ, ուրիշ պաշտոնի մասին ոչ մտածել եմ, ոչ խոսել եմ»:

Հիշեցնենք՝ Գոգյանը ԲՈԿ նախագահի պաշտոնից ազատման դիմում ներկայացրել է մայիսի 14-ին: Ավելի ուշ նա ֆեյսբուքյան գրառմամբ հայտնել էր, որ կրթության և գիտության բարեփոխման իր պատկերացումները չեն համընկել նախարարության ռազմավարության հետ: