Ծեծ կերած մարդկանցից մանդատ պահանջել… երեւի Հյուսիսային Կորեայում էլ չկա նման բան. Մարուքյանը՝ ՀՔԾ-ից դուրս եկավ

ԼՀԿ ղեկավար Էդմոն Մարուքյանը ՀՔԾ-ում տվել է բացատրություն՝ ԱԺ-ում տեղի ունեցած ծեծկռտուքի վերաբերյալ։ Այս մասին այսօր՝ մայիսի 13-ին, ՀՔԾ շենքից դուրս գալով՝ լրագրողներին հայտնեց Մարուքյանը։

«Այսօր ծանուցվել եմ, որ դատաբժշկական փորձաքննության մասին որոշում է կայացվել։ Սկզբից գնացել եմ դատաբժշկի մոտ, հետո եկել եմ այստեղ ու տվել բացատրություն։ Ասել եմ այն ինչը երեւում է տեսանյութում»,- ասաց ԼՀԿ ղեկավարը եւ հավելեց, որ գործընթացը տեւել է մոտ 2 ժամ։

Մարուքյանը նշեց, որ իր ակնկալիքն ավելի շատ քաղաքական է. «Ես իմ ելույթում էլ եմ ասել, որ հարցը քաղաքական է եւ պետք է քաղաքական հետեւանք ունենա։ Եթե դա չի դատապարտվում քաղաքական մակարդակում, դա կարող կրկնվել։ Ամեն մի պատգամավոր կարող է մտածել, որ ելույթ ունենալուց իրեն կարող են խփել, բռնություն կիրառեն՝ իր հայտարարությունների համար։ Եթե հիմա Խորհրդարանում պատգամավորների նկատմամբ բռնություն է կիրառվում, մի քանի օր հետո Մարդու իրավունքների պաշտպանին են սպառնում, էն մյուս օրը փողոցում են մարդ ծեծելու»։

Մարուքյանը նշեց, որ այդպիսով երկրում բռնությունը չի դատապարտվում։

«Ուզում են, որ ընդդիմությունն իր մանդատները վայր դնի որ իրեն ի՞նչ անեն, երկիրն ուզում են բռնապետություն դարձնե՞լ։ Ծեծ կերած մարդկանցից մանդատ պահանջելը… ես չգիտեմ՝ երեւի Հյուսիսային Կորեայում էլ չկա նման բան»,- ասաց Մարուքյանը։