Ռուսաստանի եւ Հայաստանի լարման մեջ նաեւ կա նախագահ Քոչարյանի կալանքի տակ գտնվելու հանգամանքը. Արա Վարդանյան

Հուսով եմ, որ դատավոր Աննա Դանիբեկյանն իր մեջ ուժ կգտնի՝ դեմ գնալ քաղաքական համակարգին։ Այս մասին այսօր՝ մայիսի 8-ին, լրագրողների հետ զրույցում ասաց «Հայաստան» համահայկական հիմնադրամի նախկին գործադիր տնօրեն, քաղաքագետ Արա Վարդանյանը։

Արա Վարդանյանը Շուշիի ազատագրման օրվա առթիվ շնորհավորեց ՀՀ երկրորդ եւ երրորդ նախագահներին. «Ուզում եմ շնորհավորել նախագահ Քոչարյանին, որի անմիջական ղեկավարության ներքո է դա արվել։ Ուզում եմ շնորհավորել նախագահ Սարգսյանին եւ բոլոր այն մարդկանց, որոնք մեծ ավանդ են ունեցել այդ կարեւորագույն իրադարձության մեջ»։

Վարդանյանն ասաց, որ Հայաստանի նորագույն պատմության մեջ երկրորդ անգամ է ականատես լինում Ռոբերտ Քոչարյանի գործով դատավարությանը անձնական նման երաշխավորությունների. «Մենք երկրորդ անգամ ենք ականտես լինում Հայաստանի նորագույն պատմության մեջ չտեսնված բանի. առաջինն այն է, որ նախագահ Ղուկասյանը եւ նախագահ Բակո Սահակյանը ներկայացան դատարան, անկեղծ լինեմ՝ ես այդ օրն ինձ շատ վատ եմ զգացել՝ որպես հայ։ Տհաճ է տեսնել, որ 3 նախագահ հայտնվել են դատարանում եւ ինչի՞ համար, թուրքին ենք մենք ուրախացնում։ Եվ այսօր կրկին արդեն վարչապետները ներկայացրել են երաշխավորություն, չեմ պատկերացնում՝ դատարանն ինչպե՞ս պետք է դա մերժի։ Չկա այլեւս մերժելու պատրվակ։ Հուսով եմ, որ Դանիբեկյանն իր մեջ ուժ կգտնի՝ դեմ գնալ քաղաքական համակարգին։ Ես հասկանում եմ, որ իր վրա ճնշումներ են գործադրվում, նա տեսնում է, թե ինչպես են վարվում մյուս դատավորների հետ։ Տիկին Դանիբեկյանը պետք է հասկանա, որ այս իշխանության ավարտը շատ մոտ է, նա պետք է վերադառնա օրինական ուղղու վրա»։

Անդրադառնալով Ռոբերտ Քոչարյանի գործով դատական նիստերի ձգձգմանը, Արա Վարդանյանն ասաց. «Երբ մարդը գտնվում է կալանքի տակ, դա ծայրահեղ միջոց է եւ դատարանը պարտավոր է անհապաղ իրականացնել նիստեր։ Կարող էր այլ դատավորի մակագրվել խափանման միջոցի փոփոխման միջնորդությունը, բայց կրկին Դանիբեկյանին էր մակագրվել։ Զարմացա, որ այսօր տիկին Դանիբեկյանը ներկայացել էր»։

Արա Վարդանյանը նկատեց, որ Ռուսաստանի ու Հայաստանի միջեւ լարվածությունը պայմանավորված է նաեւ Ռոբերտ Քոչարյանի՝ կալանքի տակ գտնվելով. «Մենք տեսանք, որ մոտ 10 օր առաջ ՌԴ Արգործ նախարարը հստակ մեսիջներ է ուղղել ՀՀ իշխանություններին, որը Հայաստանի եւ Ռուսաստանի հարաբերությունների իսպառ բացակայությունն է։ Եվ երեկ վարչապետի եւ Արտգործ նախարարի հայտարարություններից պարզ դառնում, որ իրենք որեւէ կերպ չեն հերքել։ Նույնիսկ Արտգործ նախարարն ընդունեց, որ Ռուսաստանի հետ կան հարցեր։ Հայաստանի նորագույն պատմության մեջ դա չլսված բան է, որ Հայաստանի ու Ռուսաստանի մեջ կա լարում։ Կասկած չունեմ, որ այդ լարման մեջ նաեւ կա նախագահ Քոչարյանի կալանքի տակ գտնվելու հանգամանքը։ Դաշտից փորձում են հեռացնել մի մարդու, ով կարող է Արցախի հարցում լուրջ դերակատարում ունենալ»։