Հայաստանում ժողովրդավարական կայունություն է հաստատվել. վարչապետ

2018 թվականի մայիսից Հայաստանում ժողովրդավարական կայունություն է հաստատվել: Այս մասին մայիսի 6-ին Ազգային ժողովի նիստին կառավարության 2019 թվականի ծրագրի իրականացման ընթացքի վերաբերյալ զեկույցի քննարկման ժամանակ ասաց ՀՀ վարչապետ Նիկոլ Փաշինյանը:

Հայաստանը, նրա խոսքով, կայուն ժողովրդավարական պետություն է: «Դուք գիտեք, որ երկրում երկար տարիներ ավտորիտար կայունություն էր հաստատված, եւ այդ ֆոնին դեմոկրատական կայունությունը կարող է անկայունություն թվալ: Բայց ես ուզում եմ նշել, որ Հայաստանում հենց ժողովրդավարական կայունություն է հաստատվել, ժողովրդի իշխանություն եւ ժողովրդավարություն, եւ դրանց ոչինչ չի սպառնում»,- նշեց կառավարության ղեկավարը:

Նա նաեւ շեշտեց, որ Հայաստանում չկա որեւէ քաղաքական, քրեական-մաֆիոզական ուժ, որն ի վիճակի է խաթարել ժողովրդավարական կայունությունը: «Ես ուզում եմ նշել, որ 2019 թվականի միջազգային ժողովրդավարության բոլոր ցուցանիշներում Հայաստանը տպավորիչ աճ է գրանցել»,- եզրափակեց Նիկոլ Փաշինյանը: