20 ամսում վարչապետի աշխատակազմի աշխատակիցներին վճարվել է 2 միլիոն 580 հազար դոլարի պարգեւավճար

2018-ի կեսից մինչեւ 2019 թվականի վերջը ՀՀ վարչապետի աշխատակազմի աշխատակիցներին վճարված պարգևավճարների չափը կազմել է 1 միլիարդ 232 միլիոն 748 հազար դրամ:

yerkir.am-ը գրավոր հարցում էր ուղարկել ՀՀ վարչապետի աշխատակազմի ղեկավար Է. Աղաջանյանի անունով՝ խնդրելով տեղեկություններ այն մասին, թե որքա՞ն է կազմել իր ղեկավարած աշխատակազմի աշխատակիցներին վճարված պարգևավճարների չափը՝ 09.05.2018 թվականից մինչև 31.12.2019 թվականը, այն է՝ Փաշինյանի վարչապետության օրոք:

«Ստացված գրավոր պատասխանից տեղեկանում ենք, որ նշված շրջանում (20 ամիս) ՀՀ վարչապետի աշխատակազմի աշխատակիցներին վճարված պարգևավճարների չափը կազմել է 1.232.748.000 ՀՀ դրամ (շուրջ 2.580.000 դոլար)»:

Պարգեւավճարների գումարն ամսական կազմել է շուրջ 129.000 դոլար․

«Ելնելով մեր ուսումնասիրություններից և փաստելով, որ 2018 թ. պարգևավճարները անհամեմատ, շատ դեպքերում՝ տասնյակ անգամներ ավելի քիչ են եղել, քան՝ 2019 թ. բյուջեով (Փաշինյանի իշխանության օրոք հաստատված բյուջե) նախատեսված և վճարված պարգևավճարները, ապա կարող ենք ենթադրել, որ, սկսած 2019 թվականից, ՀՀ վարչապետի աշխատակազմի ամսական պարգևավճարների թիվը 129.000 դոլարից շատ ավելին է», գրում է կայքը:

Ի դեպ, փոխվարչապետ Տ. Ավինյանի գրասենյակից Yerkir.am-ին տեղեկացրել են, որ փոխվարչապետի գրասենյակը ևս վարչապետի աշխատակազմի գրասենյակ է, հետևաբար, Տ. Ավինյանի գրասենյակին վճարված պարգևավճարները ևս ներառված են վարչապետի աշխատակազմի տրամադրած վերեւում նշված թվի մեջ: