ԼՂ հիմնախնդրի բանակցային գործընթացը վեր է ածված քաոսի․ Կարեն Բեքարյան

Իրականում այսօր գործ ունենք իրավիճակի հետ, երբ ԼՂ բանակցային գործընթացը վեր է ածված քաոսի, բառի բուն իմաստով։ Այս մասին 168TV-ի Սաթիկ Սեյրանյանի հեղինակային «Պրեսսինգ» հաղորդաշարի ժամանակ ասել է վերլուծաբան Կարեն Բեքարյանը։

«Նայենք Ղարաբաղյան կարգավորման գործընթացում վերջին 2 տարիներին իշխանությունների կեցվածքը, պահվածքը և դրա շուրջ եղած զարգացումները։ Մենք ունենք բավականին լայն սպեկտոր գործոնների, որոնք զարգանալով՝ ժամանակի ընթացքում հասցրեցին այն հանգրվանին, որի ականատեսն ենք վերջին օրերին (ՌԴ ԱԳ նախարար Սերգեյ Լավրովի՝ բանակցային սեղանին փուլային տարբերակը լինելու մասին հայտարարությունը)։ Հավատացեք, դրանց թիվը բավականին մեծ է»,- նշեց նա։

Ըստ Բեքարյանի՝ այսօր շատերը Լավրովի հայտարարությունից հետո եղած իրավիճակը համեմատում են 1995-1997 թթ․-ի իրավիճակի հետ։ Նա հիշեցրեց, որ երբ բանակցային գործընթացն արդեն գտնվում էր ԵԱՀԿ Մինսկի խմբի շրջանակներում, այդ պահից այն հանդես է եկել կոնֆլիկտի կարգավորման համար որոշակի փաթեթային առաջարկներով և առաջին երկու փաթեթները, որոնք հայտնվեցին Լևոն Տեր- Պետրոսյանի նախագահության շրջանում, կարգավորման փուլային և փաթեթային տարբերակներն էին։

«Առաջին նախագահը հրապարակել էր հոդված և կողմ էր հանդես եկել փուլային տարբերակին։ Եւ այս պարագայում է տեղի ունենում իշխանափոխություն։ Նախկին իշխանությունները կարողացան դինամիկայի մեջ Լևոն Տեր-Պետրոսյանի ժամանակ եղած փաթեթներից և ամրագրումներից հանել «Ղարաբաղն Ադրբեջանի կազմում»-ը և հասնել ինքնորոշման իրավունքի ամրագրմանը։ Պետության զգացողություն ունեցող մարդը, երբ ստանձնում է իշխանություն, պետք է ունենա խնդիր՝ եղածից ոչինչ չկորցնելու, չտապալելու և եղածի վրա բան ավելացնելու»,- նշեց վերլուծաբանը։

Կարեն Բեքարյանի խոսքով՝ Ապրիլյան պատերազմից հետո հայկական դիվանագիտությունը հասել էր նրան, որ փաստացի կային Վիեննայի, Սանկտ Պետերբուրգի, Ժնևի պայմանավորվածությունները, այդ թվում՝ Ադրբեջանի կողմից ընդունված․ «Մարդիկ մի քանի ամսվա ընթացքում կարողացան այս արժեքը վերացնել։ Հետո Զոհրաբ Մնացականյանը փորձեց վերադառնալ դրան»,- ասաց նա։

ՌԴ ԱԳՆ ղեկավար Սերգեյ Լավրովի հայտարարությունը, ըստ վերլուծաբանի, փաստեց, որ կան բանակցություններ․ «Հիմա փորձենք հարվածները նայել․ այստեղից պնդում են, որ բանակցություն չկա, բայց կա բանակցություն։ Հայտարարվում է, որ սեղանին բանակցային փաստաթուղթ կա, որը փուլային է։ Երրորդ՝ նշվում է բովանդակություն, որտեղ համարժեքությունը ջախջախված է։ Եւ այս ամենը ներկայացնում է ՄԱԿ-ի անվտանգության բանաձևերի «սոուսի» ներքո»,- նկատեց նա։

Ինչ վերաբերում է հայ-ռուսական հարաբերությունների մասին Նիկոլ Փաշինյանի հայտարարություններին առ այն, որ դրանք հուսալի և դրական տեմպով զարգանում են, Կարեն Բեքարյանը նշեց․ «Կարծում եմ, որ մեր հանրության առնվազն մեծամասնությունը շատ վաղուց արդեն նրա որևէ խոսքին լուրջ չի վերաբերում»։