Հաստատվեց ոստիկանության բարեփոխումների ռազմավարությունը. ստեղծվում է ՆԳՆ. արժեքը՝ 16,3 մլրդ դրամ

ՀՀ կառավարությունն այսօրվա՝ ապրիլի 23-ի նիստում հաստատեց ՀՀ ոստիկանության բարեփոխումների ռազմավարությունը և դրանից բխող 2020-2022 թվականների գործողությունների ծրագիրը:

Հարցը ներկայացրեց արդարադատության նախարար Ռուստամ Բադասյանը՝ նշելով, որ Ռազմավարությունը եւ դրանից բխող 2020-2022 թվականների գործողությունների ծրագիրը առաջին հերթին ենթադրում է կառուցվածքային փոփոխություններ եւ գործառույթների հստակեցում, այսինքն տարանջատվում է ոստիկանության մեջ քաղաքացիական բնույթի ծառայությունները բուն ոստիկանական ծառայություններից:

«Մասնավորապես, անձնագրերի, վիզաների վարչության կամ հաշվառման քննական կենտրոնների գործառույթները, ՃՈ գործառույթները դուրս են բերվում ոստիկանության համակարգի եւ Ներքին գործերի նախարարության կառուցվածքում կլինեն: Կձեւավորվի ՆԳՆ-ն, որը քաղաքականությունը ոլորտում կմշակի եւ քաղաքական պատասխանատվություն կկրի ոլորտի բարեփոխումների համար:

Հաջորդ կարեւոր կետը պարեկային ծառայության եւ օպերատիվ ծառայության կենտրոնի ստեղծումն է: Հիմա արտաքին ծռայությունը մեծապես իրականացնում է Ճանապարհային ոստիկանությունը ճանապարհային երթեւեկության անվտանգության ապահովման մասով, եւ պարեկապահակային ծառայության կողմից որոշակի այլ գործառույթների մասով: Առաջարկվում է այս երկու ծառայությունների միավորման արդյունքում ստեղծել նոր օպրեկային ծառայություն, որի գործառույթները շատ ավելի լայն կլինեն»,-ասաց նախարարը:

Բադասյանը նշեց, որ այսօր առկա են գործառութային տարաբնույթ կրկնություններանբավարար են հանցագործությունների մասին հաղորդումներին արագ արձագանքող եւ քաղաքացիներին աջակցություն ցուցաբերող անհրաժեշտ հմտություններ ունեցող շարժական ոստիկանական ստորաբաժանումներ: Ոստիկանության ծառայողներն ունեն ոչ բավարար հմտություններ հաղորդակցության եւ ուժի կիրառման տեսանկյունից»,-ասաց նախարարը:

Բադասյանը նշեց, որ այս գործողությունների ծրագիրը 3 տարվա համար գնահատվել է 16,326 մլրդ դրամ, որից 12.93 մլրդ դրամը՝ պարեկային ծառայության եւ օպերատիվ կառավարման կենտրոնի կազմավորման համար է: Այդ 12,9 մլրդ դրամից 8,4 մլրդ դրամը կհատկացվի բյուջեի կողմից, իսկ մնացածը միջազգային տարբեր գործընկերների կողմից: