Այսօր ռազմաարդյունաբերական ոլորտից դիմել են, որ դեռ պարապուրդի մեջ են. Գևորգ Գորգիսյան

«Լուսավոր Հայաստան» խմբակցության քարտուղար Գևորգ Գորգիսյանն այսօր Ազգային ժողովում Կառավարության հետ հարց ու պատասխանի ժամանակ հիշեցրեց, որ դեռ մարտի 3-ին խոսել էր այն մասին, թե ռազմաարդյունաբերության ոլորտի ներկայացուցիչները բողոքում են, որ արդեն տևական ժամանակ է պատվերներ չեն ստանում ՀՀ պաշտպանության նախարարությունից և պարապուրդի են մատնված:

Գորգիսյանը նշեց, որ ոլորտի գոծունեությունն արտակարգ դրության պայմաններում սահմանափակված չէ, սակայն պատկերը նույնն է և փաստացի՝ ոլորտի աշխատողները չեն կարող օգտվել աջակցության ծրագրերից:

Բարձր տեխնոլոգիական արդյունաբերության նախարար Հակոբ Արշակյանն արձագանքեց, թե պատվերները ստացված են, վճարումները կատարված են: «Սա նոր խնդիր չէ, բավական երկար տարիներ եղել է այս պատկերը, որ պայմանագրերն ուշ են կնքվել, այդ պատճառով տարվա սկզբում պարապուրդի խնդիր է առաջացել»:

«Այս պահին մենք Պաշտպանության նախարարության հետ ակտիվորեն աշխատում ենք, որպեսզի երկարաժամկետ պայմանագրեր կնքելու հնարավորություն ունենանք, մինչև տարվա վերջ կոնկրետ լուծումներ կառաջարկեն, որպեսզի պարապուրդի խնդիրներ չլինեն»,- ասաց նախարարը:

Պատգամավորն արձագանքեց՝ այսօր ռազմաարդյունաբերական ոլորտից դիմել են, որ դեռ պարապուրդի մեջ են: «Վերջում Ձեզ առանձին տվյալները կփոխանցեմ՝ պարզեք ինչ խնդիր է, որ քաղաքացիները շարունակում են բողոքել»։