Տաթևիկ Ռևազյանն աշխատանքից ազատել էր բոլոր ուժեղ կադրերին, որոնք իրենց վրա էին տանում թռիչքային անվտանգության հսկողությունը. Նավիկ Խաչատրյան

Ավիացիոն խորհրդատու Նավիկ Խաչատրյանը նամակ է հղել իրավասու մարմիններին և խնդրել տրամադրել Միջազգային ավիացիոն կազմակերպության կողմից ՔԱԿ-ում անցկացված աուդիտի արդյունքների մասին տեղեկատվությունը:

«Փաստինֆո»-ի հետ զրույցում մասնագետն ասաց չի կարող խոսել թեմայի մասին, քանի դեռ չի ծանոթացել աուդիտի արդյունքներին, այնուամենայնիվ ասաց գիտեին, որ փետրվարի 3-ին կայացած աուդիտը շատ վատ է լինելու. «Տաթևիկ Ռևազյանն աշխատանքից հեռացրել էր բոլոր ուժեղ կադրերին: Այն հենասյուներին, որոնք իրենց վրա տարիներ շարունակ տանում էին թռիչքային անվտանգության հսկողությունը: Այդ ամենը շատ պրոֆեսիոնալ մակարդակի վրա էր, ընդ որում 2015 թվականի աուդիտի արդյունքում 80 տոկոս էինք հավաքել և հանկարծ նման իրավիճակ է: Բայց թե ինչքան վատ է վիճակը, ոչ ոք չգիտի: Հին ռեժիմների ժամանակ այդ կարգը կար ժողովրդից պետք է պահել, չասել»,-նշեց Նավիկ Խաչատրյանը:

Վերջինս նկատեց լիցենզիայից զրկել նման եզրույթ չկա, պարզապես կարծում է ինչ-որ արգելանքներ կդնեն: Ավիացիոն մասնագետի կարծիքով հնարավոր է տրամադրեն ժամկետ, որի ընթացքում պետք է շտկվեն ինչ-ինչ խնդիրներ, բայց այն, որ իրական դրությունը վատ է, Նավիկ Խաչատրյանի խոսքով պարզ էր դեռևս նախորդ տարվա դեկտեմբերին, երբ ՔԱԿ նախագահ Տաթևիկ Ռևազյանը վարչության թիմով գնաց Բրյուսել. «Դրանից հետո դեկտեմբերի 10-ին, EASA-ի հայտարարությունը եղավ այն մասին, որ Հայաստանը շատ վատ վիճակում է, չի հետևում թռիչքային անվտանգությանը: Այնուհետև փետրվարի 3-ին Բրյուսելից թիմ եկավ: Մեկ շաբաթ մնացին և աուդիտ անցկացրեցին»,-ասաց Նավիկ Խաչատրյանը, ով չի հասկանում ինչու աուդիտի արդյունքները հանրությանը չեն ներկայացնում:

Քանի դեռ չկա որևէ հստակ տեղեկատվություն, ավիացիոն խորհրդատուն դժվարացավ ասել ինչպիսին կարող են լինել աուդիտի արդյունքները և ինչ հետևանք կթողնեն դրանք ավիացիոն ոլորտում, սակայն ասաց, որ եթե միջազգային ավիացիոն կազմակերպության կողմից ստորագրված նյութ է եկել, ապա դա պետք է գրանցվեր նաև կազմակերպության կայքում, ինչը չկա, հետևաբար մասնագետի խոսքով դա կարող է լինել պլանային ինչ-որ տեղեկատվություն. «Հնարավոր է ժամկետներ տան հայտնաբերված խնդիրները շտկելու համար, որպեսզի մնանք մեր տեղում: Նայած թե ինչ ուժգնությամբ է գրվել այդ պատասխանը: Օրինակ շատ ուժեղի դեպքում հնարավոր է չթույլատրեն ՔԱԿ-ը զբաղվի անվտանգության վերահսկողությամբ: Եթե քիչ վատ է, ապա կարող են չթողնել Հայաստանում որևէ ավիաընկերություն գրանցվի և միայն դրսի ընկերությունները գան»,-ասաց Նավիկ Խաչատրյանը` ընդգծելով, որ այս ամենը ենթադրություններ են և վերջնական որևէ բան կկարողանա ասել միայն տեղեկատվությանն ամբողջությամբ ծանոթանալուց հետո:

«Փաստինֆո»-ն այս հարցով դիմել է նաև Քաղավիացիայի կոմիտեի նախագահի օգնական Ժենյա Տեր-Վարդանյանին, ով մեր հարցմանն ի պատասխան ասաց. «Որևէ միջազգային կազմակերպություն իրավասու չէ զրկել ՀՀ Քաղաքացիական ավիացիայի կոմիտեին լիցենզիայից: Այս հարցի շուրջ կոմիտեն պաշտոնապես կներկայացնի պարզաբանում»,-հայտնում են ՔԱԿ-ից: