ԱԺ պատգամավորներն ու աշխատակիցները փետրվար ամսվա աշխատանքի համար պարգևատրվել են 61 միլիոն դրամով․ AntiFake.am

AntiFake.am-ը հարցում էր ուղարկել ԱԺ աշխատակազմին՝ խնդրելով տրամադրել ՀՀ ԱԺ նախագահ Արարատ Միրզոյանի՝ 03․03․2020թ․ Կ-38-Ա կարգադրությամբ հատկացված պագևատրումների ընդհանուր չափը։

Հարցման պատասխանում AntiFake.am-ին հայտնել են, որ ՀՀ ԱԺ նախագահ Արարատ Միրզոյանի՝ 03․03․2020թ․ Կ-38-Ա կարգադրությամբ հատկացված պագևատրումների ընդհանուր չափը կազմել է 61․149․110 ՀՀ դրամ, որը համարժեք է շուրջ 125.000 ԱՄՆ դոլարին։ Հարցման պատասխանում նաև հղում են կատարել «Անձնական տվյալների պաշտպանության մասին» ՀՀ օրենքին՝ մերժելով տրամադրել կարգադրության հավելվածը։

Հիշեցնենք նաև, որ 2020թ․ փետրվար ամսին ՀՀ Ազգային ժողովում 2 անգամ պարգևավճարներ էին բաժանվել։ Պարգևավճարները հատկացվել էին որպես խրախուսանք հունվար ամսվա 17 աշխատանքային օրերի ընթացքում Ազգային ժողովի պատգամավորների և աշխատակիցների կատարած աշխատանքի համար, որոնք պարգևատրվել էին 173.777.983 ՀՀ դրամի չափով, որը համարժեք է շուրջ 362.000 դոլարին։

Այսպիսով, հունվարի 17 աշխատանքային օրերին և փետրվարին կատարած աշխատանքների համար Ազգային ժողովի պատգամավորներն ու աշխատակիցները պարգևատրվել են 235 միլիոն դրամի կամ 495 հազար ԱՄՆ դոլարի չափով։

Նշենք, որ ԱԺ նախագահ Արարատ Միրզոյանը հայտարարությամբ է հանդես եկել, որի համաձայն՝ երկրում կորոնավիրուսի դեմ տարվող պայքարի շրջանակերում ԱԺ պատգամավորները պատրաստակամություն են հայտնել մարտ ամսի դեռևս չստացած պարգևավճարները հատկացնել կորոնավիրուսի դեմ պայքարին։