Քաղաքացիների կյանքը կազմակերպելու պատասխանատվությունը կրում է իշխանությունը. Գևորգ Պետրոսյան

Քաղաքացիների կյանքը կազմակերպելու իրավական և բարոյական պատասխանատվությունը կրում է գործող իշխանությունը. իր պատասխանատվությունը ժողովրդի վրա գցող իշխանությունն անելիք չունի: Այս մասին Tert.am-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառնալով ՀՀ վարչապետ Նիկոլ Փաշինյանի՝ այսօր արած այն հայտարարությանը, որ «սիստեմայի տակից հիվանդը դուրս է եղել և գնացել նշանդրեքի», և քաղաքացիները պետք է ինքնապաշտպանվեն:

«Եթե քաղաքացին իշխանությանը ձայն է տվել, պետք է վերջինս նրա կյանքը կազմակերպի: Քաղաքացին ձայն չի տալիս, որ մի քանի իշխանավոր իրենց համար շքեղ թռիչքներ կազմակերպեն, շքեղ հյուրանոցներում հանգրվանեն. քաղաքացին նրա համար է ձայն տվել, որ իշխանությունն իր կյանքը բարելավի: Եթե իր կյանքը բարելավված չէ, ուրեմն՝ քաղաքացին իզուր է ձայն տվել»,-ասաց պատգամավորը:

Անդրադառնալով Փաշինյանի այն հայտարարությանը, թե վերջին մեկ ամսում կորոնավիրուսի տարածման կանխարգելիչ գործողությունները պատշաճ իրականացվել են, Պետրոսյանն ասաց, թե այդ գործողություններն անբավարար է գնահատում:

«Ամեն ինչ չէ, որ ձեռնարկվել է: Հենց միայն այն, որ դեղատներն ապահովված չեն վիրուսից պաշտպանվելու համար անհրաժեշտ միջոցներով, խոսում է այն մասին, որ իշխանությունները համապատասխան գործողություններ չեն կատարել, և երկիրն անպատրաստ է եղել: Իշխանությունները կարևոր հարցերը թողած՝ երկրորդական հարցերով են զբաղվում: Ժողովրդի մեջ խուճապ ու անհանգստություն կա, որը հիմնականում պայմանավորված է դեղատների ոչ լիարժեք հագեցվածությամբ, իսկ այդ հարցով պետք է զբաղվեր նաև իշխանությունը»,-ասաց պատգամավորը՝ կոչ անելով իշխանությանը զբաղվել առաջնային խնդիրներով:

«Մեր ժողովուրդն այնքան մեծ չէ, մեզ համար մարդկային յուրաքանչյուր կյանք թանկ է, և այսօր այդ խնդիրը թողած՝ ինչ-որ քարոզարշավով զբաղվելը մեր երկրի համար շռայլություն է»,-նշեց նա:

Անդրադառնալով վարչապետի կոչին, թե կորոնավիրուսն այդքան էլ վտանգավոր չէ և խուճապի կարիք չկա, Պետրոսյանն ասաց. «Կառավարության կողմից լուրջ չէ ժողովրդին թողնել անհոգ վիճակի մեջ, հետո մեծ հոգսեր ստանձնել: Պատահական չէ, որ ԱՀԿ-ն կորոնավիրուսը հայտարարեց պանդեմիա: Անպայման պետք է զոհե՞ր ունենանք, որ հետին թվով իմաստուն ձևանանք»:

Նշենք, որ այս պահին Հայաստանում կորոնավիրուսով վարակված 8 քաղաքացի կա: Առաջին դեպքը արձանագրվել է մարտի 1-ին:

Այս թեմայով Ա՛յ Նիկոլ, ինչի՞ պատասխան չես տալիս Ալիևին, Լյուբով Ուսպենսկայան ա պատասխանում դրան․ Պետրոսյան Էդ ո՞ր ախմախը ներդրում կանի մի երկրում, որի իշխանությունը ժողովրդին սպառնում է պողպատով Սա ի՞նչ հայտարարություն էր. մենք որոշել ենք ցրե՞լ ԱԺ-ն․ Գևորգ Պետրոսյանը՝ Արարատ Միրզոյանին Նիկոլ Փաշինյանը քաղաքական ուժերին կուտը տալու է, բերի ընտրության, հետո քցելու է իրենց. Գեւորգ Պետրոսյան «Ոչինչ չեմ բացառում». Գեւորգ Պետրոսյանը միանում է Ռոբերտ Քոչարյանի թիմի՞ն