20-30 տարի անց Սեւանի ափին 10 հա մակերեսով անտառ կվերականգնվի. փոխնախարար

Երկկողմ համագործակցության շրջանակներում Բելառուսը 2018-ին Հայաստանին անվճար 50 հազար տնկի կտրամադրի, որից 25 տոկոսը` փակ արմատային համակարգով: Այս մասին մարտի 13-ին լրագրողների հետ զրույցում հայտարարեց ՀՀ բնապահպանության նախարարի տեղակալ Վարդան Մելիքյանը:

Նախարարը պարզաբանել է, որ դրանք տնկվել են Սեւանի ափին` 10 հա մակերեսով տարածքում` մինչև 90-ականները նույն տեղում եղած անտառը վերականգնելու համար:

«20-30 տարի հետո այս տարածքում լիարժեք անտառ կլինի: Ծառերի գոյատեւման մակարդակն այժմ 50-60 տոկոս է, ինչը բավարար պայման է համարվում Հայաստանի դեպքում: Բելառուսցի գործընկերների հետ միասին լրացուցիչ աշխատանքներ կտարվեն այդ թվերի ավելացման համար», - ասաց նա:

Անդրադառնալով 2020 թվականին 10 միլիոն ծառի տնկման ծրագրին` Մելիքյանը շեշտեց, որ Բելառուսը պատրաստ է 10 միլիոն ծառ մատակարարել Հայաստանին, սակայն բանակցություններ են ընթանում նաեւ Ռուսաստանի հետ:

Հիշեցնենք, որ մարտի 13-ին Հայաստանում Սեւանա լճի ափին հայ-բելառուսական բարեկամության անտառ է բացվել: