Ալկոհոլի նույնիսկ չափավոր քանակությունը քայքայում է ուղեղը. գիտնականներ

Օրական նույնիսկ մեկ բաժակ գինու օգտագործումը կարող է վնասել ուղեղը եւ ժամանակի ընթացքում մտավոր գործառույթների խանգարում առաջացնել, զգուշացնում են Օքսֆորդի համալսարանի հետազոտողները:

Նրանց խոսքով` ալկոհոլի նույնիսկ չափավոր օգտագործումը մեծացնում է հիշողության հետ կապված խնդիրների առաջացման եւ ծերունական տկարամտության զարգացման հավանականությունը:

Նրանք 30 տարի` 1985 թվականից սկսած, հետեւել են 550 տղամարդկանց եւ կանանց խմած ալկոհոլի ծավալին եւ ուղեղի մտավոր աշխատանքին: Դիտարկումների վերջին փորձի բոլոր մասնակիցների ուղեղի մագնիսառեզոնանսային տոմոգրաֆիայով սքանավորում են կատարել: Նշենք, որ կամավորներից ոչ մեկը ալկոհոլային կախվածությամբ չի տառապել, սակայն սպիրտային ըմպելիքների օգտագործման մակարդակը բոլորի մոտ տարբեր է եղել:

Հետազոտությունից 23 մարդու բացառելով տեղեկությունների անբավարարության կամ այլ պատճառներով` գիտնականները հանգել են այն եզրակացության, որ ալկոհոլի ցանկացած քանակ մտավոր խնդիրների կատարման վրա բացասաբար է ազդում: Ուշադրություն դարձնելով մի շարք այլ գործոններին, այդ թվում` տարիքին, սեռին, սոցիալական ակտիվությանը եւ կրթական մակարդակին, գիտնականները հայտնաբերել են, որ սպիրտային ըմպելիքների առավելագույն քանակ օգտագործած մարդիկ հիպոկամպի փոքրացած ծավալ են ունեցել` ուղեղի գոտի, որը կապված է հիշողության հետ: Ընդհանրապես սպիրտային ըմպելիքներ չօգտագործած մարդկանց 35 տոկոսը բախվել է հիպոկամպի աջ հատվածի փոքրացման հետ: Նրանք, ովքեր շաբաթական ալկոհոլ են օգտագործել 14-ից մինչեւ 21 չափաքանակով, փոքրացումը կազմել է 65 տոկոս, իսկ ովքեր խմել են 30 եւ ավելի չափաբաժին` 77 տոկոս:

Սպիտակ նյութի պահպանման կառուցվածքը նույնպես կապված է մարդկանց օգտագործած սպիրտային ըմպելիքների քանակի հետ: Ալկոհոլի առավելագույն քանակ ստացած մարդիկ զգալիորեն վատ են հաղթահարել բառապաշարի թեստերը: Ընդհանուր առմամբ, հետազոտությամբ պարզվել է, որ սպիրտային ըմպելիքների ցանկացած քանակ բացասաբար է ազդում ուղեղի աշխատանքի վրա` մոտեցնելով ծերունական տկարամտությունը, եւ ալկոհոլի ոչ մի մակարդակ մարդու համար պաշտպանական նշանակություն չունի:

Նշենք, որ վերջերս այլ հետազոտություններ են հրապարակվել, որոնք վկայում են, որ գոյություն չունի առողջության համար ալկոհոլի անվտանգ քանակ. այսպես` Քաղցկեղի հետազոտման ամերիկյան ինստիտուտի եւ Քաղցկեղի հետազոտման համաշխարհային հիմնադրամի գիտնականները պնդում են, որ ամեն օր մեկ բաժակ գինի կամ ալկոհոլային այլ ըմպելիքի մեկ չափաբաժին խմող կանանց մոտ մեծանում է կրծքագեղձի քաղցկեղի առաջացման հավանականությունը:

NEWS.am Medicine