Ես ատում եմ հայ ժողովրդի խեղճությունը. Նիկոլ Փաշինյանը հայտարարեց, որ ինքը Մեխակի նման մի տղա է

Մենք մեր լացը պետք է հաղթահարենք, մենք մեր խեղճությունը պետք է հաղթահարենք: Ես Մեխակի հետ, բոլոր «մեխակների» հետ այդ կռիվն ունեմ, որովհետև ես էլ Մեխակի նման մի տղա եմ՝ ծնված Իջևանի մի սովորական ընտանիքում, որին անընդհատ ասել են, որ մեջք պետք է ունենալ, վիզ ծռել: Բայց Աստծո օգնությամբ, հավատալով Աստծուն… մենք պետք է հավատանք ինքներս մեզ, իրար հավատանք, որովհետև ապացուցել ենք, որ ուժեղ ենք: Սիսիանում հանրահավաքի ժամանակ հայտարարեց ՀՀ վարչապետ Նիկոլ Փաշինյանը:

«Ոչինչ, թող այդ ճանապարհին սխալվենք, հազար անգամ ներողություն կխնդրենք: Ես ուզում եմ հարյուր հազար անգամ ներողություն խնդրել ում, որևէ ակնարկով, խոսքով նեղացրել եմ, վիրավորել: Ներողություն եմ խնդրում, բայց ձեր խեղճության դեմ կռիվ եմ տալու, պատերազմ եմ տալու, ես վիզը ծուռ ՀՀ քաղաքացի չեմ ուզում տեսնել: Ես ատում եմ խեղճությունը, հայ ժողովրդի խեղճությունը: Հայ ժողովուրդը պետք է խեղճ չլինի»,-ասաց նա:

Փաշինյանը նշեց, որ հիմա քաղաքական հայտնի շրջանակները Մեխակին դրոշ են դարձրել. «Բա այ խելոքներ, Մեխակը ձեր իշխանության ժամանակ է ծնվել, մեծացել ու տուն կորցրել: Ինչո՞ւ այդ հարցը չեք լուծել: 50 անգամ հայտարարել էր աղետի գոտի հասկացությունը վերացնելու մասին: Ինչո՞ւ չեք վերացրել: Ինչո՞ւ է Մեխակն այդ առողջական վիճակին:

Ես տվյալներ ունեմ մեր սերնդի առողջական վիճակի մասին: Ձեր իշխանության օրոք են այդ երեխաները ծնվել մեծացել: Եկեք տեսնենք, թե ինչ առողջական խնդիրներ ունեն մինչև 20 տարեկանները: Դա է ձեր իշխանության գնահատականը:

Իսկ մենք ասել ենք, որ մինչև 18 տարեկանների բուժսպասարկումն անվճար է: 2018-19 թվականներին մենք 4 միլիարդ դրամ ենք հատկացրել, որպեսզի աղետի գոտու այն բնակիչների տների հարցը, ում նկատմամբ պետությունը պարտավորություն ունի, լուծի:

2020 թվականին 3 միլիարդ ենք հատկացրել, իսկ 2017-ին 500 միլիոն էին հատկացրել:

Մանկատան 300 սաները, որոնց պետությունը տուն է պարտք 2001 թվականից, 2020-ին են տուն ստանում, որովհետև մենք 2 միլիարդ հատկացրեցինք»:

Փաշինյանը խոսեց նաև Ադրբեջանից բռնագաղթվածների բնակարանների հարցը լուծելու մասին. «Բա ո՞ւր էին Մեխակին դրոշ սարքողները մինչև հիմա: Քանի՞ անգամ էիք ձեր ավտոմեքենան կանգնեցրել ու խոսել մարդկանց հետ, լսել խնդիրները: Ե՞րբ եք մարդկանց հետ շփվել: Ե՞րբ են մարդիկ ձեր երեսը տեսել, այ «Ոչ»-իստներ»: