ՀՀ Լոռու մարզպետարանում մեկ տարվա ընթացքում շուրջ 181 մլն դրամ պարգևավճար է տրվել

Yerkir.am կայք գրավոր հարցում է ուղարկել ՀՀ Լոռու մարզպետ Անդրեյ Ղուկասյանի անունով՝ խնդրել, որպեսզի տեղեկություններ տրամադրվեն, թե որքա՞ն է կազմել մարզպետարանի աշխատակիցներին վճարված պարգևավճարների չափը՝ 09.05.2018 - 31.12.2019 թթ., այն է՝ Նիկոլ Փաշինյանի իշխանության օրոք:

Ստացված գրավոր պատասխանից (կցվում է) երևում է, որ 2018թ. մայիսից մինչ տարեվերջ ՀՀ Լոռու մարզպետարանի աշխատակիցներին 2 հոդվածներով («Քաղաքացիական, դատական և պետական ծառայողների պարգևատրում» և «Աշխատողների աշխատավարձեր և հավելավճարներ») տրվել է շուրջ 34 մլն դրամ պարգևավճար:

2019թ. արդեն հիշյալ երկու հոդվածներին ավելացվել է ևս մեկը («Պարգևատրումներ, դրամական խրախուսումներ և հատուկ վճարներ»), ինչի շնորհիվ էլ նույն տարում պարգևավճարների թիվը շեշտակի աճել է՝ դառնալով շուրջ 147 մլն դրամ:

Այսինքն՝ 09.05.2018 - 31.12.2019 թթ., այն է՝ Փաշինյանի իշխանության օրոք, Լոռու մարզպետարանում տրվել է շուրջ 181 մլն դրամի կամ շուրջ 380 հազար ԱՄՆ դոլարի պարգևավճար:

Կայքը հիշեցրել է, որ օրեր առաջ անդրադարձ էր կատարվել նաև ՀՀ Արարատի մարզպետարանի պարգևավճարներին՝ կրկին փաստելով, որ 2018թ., այն է՝ նախորդ իշխանությունների օրոք 1 հոդվածով հաստատված շուրջ 32 մլն դրամ պարգևավճարի փոխարեն՝ 2018թ. դեկտեմբերի 27-ին (Նիկոլ Փաշինյանի իշխանության օրոք) հաստատված 2019թ. բյուջեում արդեն 2 հոդվածներով հաստատված պարգևատրման գումարը կազմել էր շուրջ 117 մլն դրամ:

Նյութն ամբողջությամբ՝ սկզբնաղբյուր կայքում: