«Այդ մարդիկ մտածել են, որ կարող են հին մեթոդներով գնալ առաջ». Դավիթ Անանյանը՝ ՊԵԿ աշխատակիցների ձերբակալման մասին

Երբ միջին վիճակագրական արժեքային համակարգը անձի մոտ դեռ ձեւավորված չէ կամ շատ հեռու է ձեւավորման առումով, եկամուտը կամ պարգեւավճարը որեւէ ձեւով չի կարող օգնել: Այս մասին, այսօր՝ հունվարի 13-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը՝ անդրադառնալով փաստին, որ մաքսայինի 6 պաշտոնատարն անձինք են ձերբակալվել վերջերս:

«Եկեք չպատասխանեմ հարցին, թե նրանք հին աշխատողներ էին, թե մեր կողմից նշանակված, որովհետեւ դա մեզ համար որեւէ կապ չունի: Մենք ԱԱԾ-ի եւ ոստիկանության հետ համատեղ միջոցառումներ ենք իրականացնում եւ ոչ միայն մեզ մոտ, ամբողջ կառավարությունում, այդ թվում ուժային կառույցներում, ինքնամաքրման գործընթաց է գնում: Սա դարձել է սովորական գործընթաց»,-ասաց նա:

Անանյանը նաեւ հավելեց. «Եթե մարդը որոշել է, որ պետք է լինի պետական ծառայող, ինքը պետք է նաեւ դրա «անբարենպաստ» հետեւանքները գիտակցի, որ այդ ծառայությունը պետական հատվածում ավելի պակաս է վարձատրվում, քան նույն ծառայությունը մասնավոր հատվածում: Մենք համարվում ենք այն գերատեսչությունը, որտեղ անձանց միջին եկամուտները համեմատաբար բարձր են: Հիմա մենք ասում ենք՝ եթե գումարը բավարար չէ, գնա մասնավոր հատված:

Ձեր նշած օրինակում, երեւի թե անձինք մտածել են, որ կարող են այնպիսի մեխանիզմներով աշխատել, որ լինելով անպատիժ, կարող են հին մեթոդներով գնալ առաջ: Մենք դա բացահայտել ենք»: