ՀՀ իշխանությունները որևէ մասնակցություն չեն ունեցել ԱՄՆ Սենատի կողմից Ցեղասպանության բանաձևի ընդունման գործում, հիմա պետք է տեղից շարժվեն. Սուրեն Սարգսյան

Հայաստանի իշխանությունները որևէ մասնակցություն չեն ունեցել ԱՄՆ Սենատի կողմից Ցեղասպանության բանաձևի ընդունման գործում և պետք է հաշվի առնել, որ բանաձևը օրենք չէ: Այս մասին Tert.am-ի հետ զրույցում ասաց միջազգայնագետ Սուրեն Սարգսյանը՝ նշելով, որ այն հայտարարություն է, որը չունի իրավաբանական պարտադիր ուժ, և ԱՄՆ նախագահ Դոնալդ Թրամփի ստորագրությանն էլ չի գնալու:

«Թե՛ այս, թե՛ Ներկայացուցիչների պալատի ընդունած բանաձևով որևէ պարտադիր նախապայման չկա, որ ԱՄՆ նախագահն ու պետական պաշտոնյաները պարտավոր են կիրառել «ցեղասպանություն» բառը»,- նշեց Սարգսյանը:

Անդրադառնալով հարցին, թե ինչու հիմա տեղի ունեցավ բանաձևի ընդունումը, երբ մի քանի սենատորներ վետո էին դնում բանաձևի քննարկմանը, միջազգայնագետը ասաց, թե հանգամանքները մի քանիսն են:

«Այսօր հակաթուրքական տրամադրությունները Վաշինգտոնում շատ ընդգծված են, իսկ թուրքերին պաշտպանելը անշնորհակալ գործ է, թուրք-ամերիկյան հարաբերությունները երբեք այսքան վատ չեն եղել: Վետո կիրառած սենատորների վրա կար հանրային լուրջ ճնշում, որն ավելի ուժեղ էր, քան Սպիտակ տան խնդրանքները, դրա համար նրանք վետոն չվերահաստատեցին»,- ասաց Սարգսյանը՝ նշելով, թե սա մեր պատերազմը չէր, բայց մենք ունեցանք մեր հաղթանակի բաժինը:

Ըստ միջազգայնագետի՝ այդ հաղթանակի համար իր մեծ դերակատարումն է ունեցել ԱՄՆ հայկական համայնքը, իսկ այժմ վերջինս պետք է հետևողական աշխատանք տանի նաև ադմինիստրացիայի հետ՝ հասնելու նրան, որ ԱՄՆ նախագահն օգտագործի այդ բառը:

«Այժմ պետք է նաև Հայաստանի իշխանությունները, այսպես ասած, տեղից շարժվեն, որովհետև այս ամբողջ ընթացքում որևէ մասնակցություն չեն ունեցել գործընթացում»,-ասաց Սուրեն Սարգսյանը: