Վարչապետն ասում էր վենդետա չի լինելու, բայց ընթացքում տեսնում ենք, որ լրիվ վենդետա է․Քոչարյանի աջակից
Վերջին ժամանակներս լավ բան չեմ տեսնում։ Այս մասին այսօր՝ դեկտեմբերի 1-ին, Արմավիրի մարզի Արմավիր քաղաքում ի աջակցություն ՀՀ երկրորդ նախագահ Ռոբերտ Քոչարյանի անցկացվող ստորագրահավաքի ժամանակ ասաց Քոչարյանի աջակիցներից մեկը։
«Սկզբում վարչապետն ասում էր վենդետա չի լինելու, բայց ընթացքում տեսնում ենք, որ լրիվ վենդետա է։ Հերոսների նկատմամբ ատելություն են քարոզում, ժողովուրդը գնալով անդունդն է գլորվում։ Ինձ համար ցավալի է նաև, որ նախարարների աշխատավարձներն են կրկնապատկվում, ավելի լավ կլինի սահմանին կանգնած մեր սպաների, մեր պայմանագրային ծառայողների աշխատավարձը տասնապատկեն, որովհետև ինչքան թիկունքն ուժեղ լինի, մենք կունենանք ուժեղ պետություն»,-ասաց նա։
Իսկ Ռոբերտ Քոչարյանի հետ կատարվողը քաղաքացին ցավալի որակեց․ «Երևի մոռանում են, որ մինչև 2008 թվականը Հայաստանի համար եղել է ամենածաղկուն ժամանակաշրջանը, ես դրանից հետո չեմ տեսել մեր ժողովորդը նորմալ ապրի, ես ոչ մի կուսակցության մեջ չեմ եղել, բայց այս ամենն ինձ համար ցավալի է։ Ես ուզում եմ ժողովուրդն ողջամիտ լինի, որովհետև միակ հույսը հեղափոխությունն էր, բայց հեղափոխությունը ոչ մի արդյունք չի տալիս, ժողովրդի ողնաշարն է կոտրում»։