2020-ի բյուջեի նախագծում նշված ցուցանիշը պետք է կատարենք եւ գերակատարենք, այդպիսի պոտենցիալ տեսնում ենք. ՊԵԿ նախագահ
Ցուցանիշը, որ նշված է 2020-ի բյուջեի նախագծում, մենք պետք է կատարենք եւ գերակատարենք, որովհետեւ այդպիսի նախադրյալներ եւ պոտենցիալ մենք տեսնում ենք: Այս մասին, այսօր՝ նոյեմբերի 4-ին, ԱԺ-ում լրագրողների հետ զրույցում նշեց ՊԵԿ նախագահ Դավիթ Անանյանը:
Անդրադառնալով վարչապետի այն դիտարկմանը, որ հաջորդ տարվա բյուջեն պահպանողական է, եւ կառավարությունը դրականի հույս ունենալով նախապատրաստվում է վատագույնին, Դավիթ Անանյանն ասաց. «Տնտեսությունն առողջ օրգանիզմ է: Ցանկացած օրգանիզմի զարգացման որոշակի փուլերում դու չես կարող 100 տոկոսով իմանալ, թե տվյալ օրգանիզմը, տվյալ դեպքում մեր երկրի տնտեսությունն ինչպիսի արձագանքներ կունենա, օրինակ, համաշխարհաիյն զարգացումներին:
Մենք բոլորս էլ գիտենք, որ կան տարածաշրջանային խնդիրներ, եւ դրանք աշխարհաքաղաքական առումով կարող են որոշակի իրավիճակներ ստեղծել նաեւ հաջորդ տարի մեր երկրի համար: Եթե մենք գիտենք եւ տվյալ դեպքում երկրի ղեկավարը, բնականաբար, ավելի շատ տեղեկատվություն ունի այդ բոլոր հնարավոր զարգացումներից, ինքն իրավունք ունի որոշակի վերապահումներ արտահայտելու: Ես կոնկրետ ՊԵԿ-ի գործառույթներից ելնելով, ասում եմ, որ մենք ունենք ներուժ ծրագրային ցուցանիշը կատարելու եւ նաեւ գերակատարելու համար»: