Հրայր Թովմասյանի սանիկի նույն քրգործով ամբաստանյալ Տիգրան Տեր-Հարությունովը ենթարկվում է խոշտագման

ԱՆ օրինականության վերահսկողության տեսչության նախկին պետի եւ «Հողի եւ ունեցվածքի գործառնություններ» ՓԲԸ-ի աշխատակից Տիգրան Տեր-Հարությունովի մոտ առկա է հաշմանդամության 2-րդ կարգի տրամադրման համար հիմք հանդիսացող աջակողմյան խլություն (100%), ձախակողմյան ծանրալսություն։ Նման պայմաններում վերջինիս նկատմամբ ընտրված կալանքը ոչ այլ ինչ է քան պատիժ, որը նշանակում է, որ Տիգրան Տեր-Հարությունովը ենթարկվում է խոշտանգման։ Այս մասին հայտարություն է տարածել Տիգրան Տեր-Հարությունովի պաշտպան Մհեր Հակոբյանը։

Նշենք, որ ՀՀ քննչական կոմիտեի ՀԿԳ քննության գլխավոր վարչության ընդհանուր բնույթի եւ ընտրական հանցագործությունների քննության վարչությունում քննվող քրեական գործի նախաքննության շրջանակներում, ՀՀ ոստիկանության ԿՀԴՊ ԳՎ ծառայողների հետ իրականացված մեծածավալ քննչական եւ դատավարական գործողությունների արդյունքում փաստական տվյալներ են ձեռք բերվել՝ ՍԴ նախագահ Հրայր Թովմասյանի՝ ՀՀ արդարադատության նախարար պաշտոնավարման ժամանակահատվածում, ՀՀ արդարադատության նախարարության աշխատակազմի օրինականության վերահսկողության տեսչության պետի պաշտոնը զբաղեցրած Նորայր Փանոսյանի եւ ՀՀ ԱՆ ու Երեւանի քաղաքապետարանի այլ պաշտոնատար անձանց կողմից իրենց պաշտոնեական լիազորությունները չարաշահելու դեպքերի վերաբերյալ:

Տիգրան Տեր-Հարությունովի պաշտպանի հայտարարության մեջ, մասնավորապես, ասվում է.

«Ցանկանում եմ Ձեր բոլորիդ ուշադրությունը հրավիրել մեր երկրում տեղի ունեցող եւս մեկ անարդարության վրա, որն անմիջական առնչություն ունի վերջին օրերին ԶԼՄ-ով լայն քննարկման առարկա հանդիսացող, այսպես կոչված «ճնշել Հրայր Թովմասյանին» օպերացիայի հետ։ Մասնավորապես, այդ «օպերացիայի» շրջանակում ապօրինի կալանավորված է Տիգրան Տեր-Հարությունովը, ում առաջադրված մեղադրանքը, որն արհեստականորեն որակվել է որպես ծանր հանցագործություն, ի վիճակի չեն վերծանելու նույնիսկ բրիտանացի գիտնականները։ Ընդ որում, Տիգրան Տեր-Հարությունովին մեղադրանք է առաջադրվել իր բնույթով խորհրդատավական նշանակություն ունեցող փաստաթուղթ ենթադրաբար կազմելու եւ տրամադրելու միջոցով միայն քննիչի մտքում գոյություն ունեցող անձանց օժանդակելու համար։ Այսինքն, անձին մեղադրանք է առաջադրվել «հանցագործին» օժանդակելու համար, սակայն այդ հանցագործի անձը մինչ օրս հայտնի չէ։ Անկախ առաջադրված մեղադրանքից Տիգրան Տեր-Հարությունովը բնութագրվում է բացառապես դրական, նախկինում դատված չի եղել, խնամքին են գտնվում երկու մանկահասակ երեխաները՝ 3 եւ 5 տարեկան, ունի մշտական բնակության վայր ու կայուն սոցիալական կապեր, մշտական աշխատանք, ու թեեւ նրա նկատմամբ շուրջ վեց ամիս փաստացի իրականացվում է քրեական հետապնդում, սակայն նա սեփական նախաձեռնությամբ մասնակցել է բոլոր քննչական եւ դատավարական գործողություններին, քրեական գործի նյութերի նախապատրաստության փուլում բացատրություն է տվել, քննիչի հեռախոսազանգի հիման վրա առանց որեւէ դատավարական կարգավիճակի մատնանշման ու ծանուցագրի, ինքնակամ ներկայացել է վարույթն իրականացնող մարմնին, որպես կասկածյալ եւ մեղադրյալ տվել է մանրակրկիտ ցուցմունքներ, պատասխանել է քննիչի բոլոր հարցերին, վարույթն իրականացնող մարմնից չի թաքնվել, որեւէ կերպ քրեական գործի քննությանը չի խոչընդոտել, սակայն, անկախ այս հանգամանքներից, վերջինս խարդախությամբ ձերբակալվել է եւ այնուհետեւ ապօրինի կալանավորվել, որի նպատակը որքան հնարավոր է երկար անձին անազատության մեջ պահելն է՝ «խելքը գլուխը հավաքելու համար»։ Այդ մասին է վկայում նաեւ այն, որ, օրինակ՝ գրավը որպես կալանավորման այլընտրանքային խափանման միջոց կիրառելու մասին պաշտպանության կողմի հոկտեմբերի 4-ի միջնորդության քննարկումը հետաձգվել եւ նշանակվել է նոյեմբերի 20-ին՝ կալանքի ժամկետը լրանալուց 8-օր առաջ, երբ արդեն ներկայացված կլինի կալանքի ժամկետը երկարացնելու մասին քննիչի հերթական «շաբլոնային» միջնորդությունը։ Հաշվի չի առնվել նույնիսկ այն հանգամանքը, որ Տիգրան Տեր-Հարությունովը ֆիզիկապես վատառողջ է, մասնավորապես՝ նրա մոտ առկա է հաշմանդամության 2-րդ կարգի տրամադրման համար հիմք հանդիսացող աջակողմյան խլություն (100%), ձախակողմյան ծանրալսություն։ Նման պայմաններում վերջինիս նկատմամբ ընտրված կալանքը ոչ այլ ինչ է քան պատիժ, որը նշանակում է, որ Տիգրան Տեր-Հարությունովը ենթարկվում է խոշտանգման։ Խնդրում եմ բոլոր իրավապաշտպան կազմակերպություններին իրենց աջակցությունը ցուցաբերել ազատելու Տիգրան Տեր-Հարությունովին ու վերականգնելու արդարությունը»։