Երևանում ԵԱՏՄ գագաթնաժողովը խոստանում է պատմական լինել. «ՌԻԱ Նովոստի»-ի անդրադարձը

Յուրահատուկ պայմանագիր Սինգապուրի հետ, պատմական իրադարձություն Իրանի համար և Արևմուտքի հիվանդագին արձագանքը Սերբիայի և արևելյան գործընկերների միջև սպասվող համաձայնագրերին. ՀՀ մայրաքաղաքում մեկնարկող ԵԱՏՄ գագաթնաժողովն արդեն իսկ շատ նորություններ է բերում: Գագաթնաժողովին մեծ ուշադրություն է հատկացվում ևս մեկ պատճառով՝ ԵԱՏՄ-ն շուտով կդառնա 5 տարեկան, գրում է ռուսական «РИА Новости»-ն:

Այս տարի, բացի միության անդամ երկրների ղեկավարներից, Երևան են ժամանել նաև Մոլդովայի նախագահ Իգոր Դոդոնը, Իրանի նախագահ Հասան Ռոհանին և Սինգապուրի վարչապետ Լի Սյեն Լունը: Սակայն Երևանում առանձնահատուկ անհամբերությամբ սպասում էին ՌԴ նախագահ Վլադիմիր Պուտինին, որի վերջին այցը Երևան եղել է մոտ 3 տարի առաջ՝ 2016 թվականին՝ ՀԱՊԿ գագաթնաժողովին մասնակցության համար: Ինչ Հայաստանում տեղի է ունեցել, այսպես կոչված, «թավշյա հեղափոխությունը», երկու երկրների առաջնորդների հանդիպումները տեղի են ունեցել կա՛մ Ռուսաստանում, կա՛մ միջազգային հարթակներում, գրում է գործակալությունը:

«Այդ իսկ պատճառով Պուտինի ներկայիս այցին սպասում էր թե՛ քաղաքական էլիտան, թե՛ հասարակ քաղաքացիները, որոնց համար Ռուսաստանի հետ համագործակցությունը չափազանց կարևոր է»,- գրում է լրատվամիջոցը:

ԵԱՏՄ օրակարգի հարցերից ու խնդիրներից դուրս ՌԴ նախագահը Երևանում երկկողմ հանդիպումներ կունենա ՀՀ վարչապետ Նիկոլ Փաշինյանի և ԻԻՀ նախագահ Հասան Ռոհանիի հետ:

Հետաքրքիր է, որ The Washington Post-ի տվյալներով՝ Երևան պետք է ժամաներ նաև Դոնալդ Թրամփի անձնական փաստաբան Ռուդոլֆ Ջուլիանին, սակայն նա, իբր, հրաժարվել է՝ իմանալով, որ նույն հարթակում է լինելու Պուտինի հետ:

Հոբելյանական գագաթնաժողովի օրակարգում կլինի արդեն ավանդական դարձած առևտրի ոլորտում խոչընդոտների հարցը, որն անցած տարվա գագաթնաժողովի ժամանակ խիստ ձևով բարձրացրել էր Բելառուսի նախագահը:

Գագաթնաժողովին սպասվում են առևտրային նոր համաձայնագրեր Սինգապուրի և Իրանի հետ, այս ամիս ուժի մեջ է մտնելու նաև Չինաստանի հետ համաձայնագիրը: Այս համաձայնագրերը կպարզեցնեն առևտրային գործընթացները ԵԱՏՄ-ի և տվյալ երկրների միջև:

Մինչ տարեվերջ սպասվում է նաև ազատ առևտրի մասին համաձայնագրի կնքում Սերբիայի հետ, որից հետո սերբ արտահանողները կկարողանան ԵԱՏՄ երկրներ արտահանել այծի ու ոչխարի պանիր, սերբական կոնյակ և ծխախոտ:

ԵԱՏՄ օրակարգում է նաև առևտրի ազատականացումն Իսրայելի հետ, որը, Պուտինի կարծիքով, պետք է արագացնել: