Նախկին համայնքապետը դատի է տալու Արարտի մարզպետին

Արարատի մարզպետ Գարիկ Սարգսյանը աշխատանքից ազատել է Նորաշեն համայնքի ղեկավար Նորայր Գրիգորյանին։ Նշենք, որ համայնքապետը օրենքով սահմանված կարգով բնակիչների կողմից ընտրված՝ համայնքի գործադիր մարմին է որն իրականացնում է Սահմանադրությամբ և «ՏԻՄ մասին» օրենքով նախատեսված լիազորությունները, այսինքն՝ լուրջ պատճառներ են պետք համայնքապետին պաշտոնանկ անելու համար, և դրա իրավունքը, ըստ օրենքի, ունի կառավարությունը։ «Հրապարակը» կապվեց արդեն նախկին համայնքապետ Նորայր Գրիգորյանի հետ, վերջինս մեզ հետ զրույցում ասաց, որ պատրաստվում է դատի տալ մարզպետին և կառավարությանը․

«Մարզպետը սխալ է արել, ես նրան դատի եմ տալու ու դատը շահելու եմ, մարզպետին էլ և կառավարությանն էլ։ Իմ փոխարեն հիմա ավագանու անդամի են նշանակել ժամանակավոր պաշտոնակատար, իրենց սիրելի զավակներից մեկին, որին իրենք հովանավորում են, Հարությունյան Արտակին։ Ես փաստաբան եմ վարձել, փաստաբանը այդ բոլոր հարցերը կլուծի»։

Հարցրինք, թե մարզպետի կողմից որևէ պարզաբանում տրվել է, հիմքեր ներկայացվե՞լ են․

« Ոչ, ես մարզպետի կողմնապահությունը նկատում եմ, դրա համար ես մարզպետի հետ չեմ լուծում իմ հարցերը»,- ասաց Գրիգորյանը։

Փորձեցինք նաև կապվել մարզպետ Գարիկ Սարգսյանի հետ, սակայն նա այդպես էլ չպատասխանեց մեր հեռախոսազանգերին։ Նշենք նաև, որ համայնքապետի պաշտոնանկության վերաբերյալ որևէ տեղեկատվություն չկա մարզպետարանի պաշտոնական կայքում։