Վարչապետը չի կարող մարդ ուղարկի որեւէ մեկի մոտ, որ որեւէ մեկին լռեցնի. դա իր մեթոդը չի. Ավինյան

Ես իմ լիազորություններից ելնելով այս խնդրի հետ կապված որեւէ ավելացնելու բան չունեմ վարչապետ Նիկոլ Փաշինյանի ասածին: Այս մասին, այսօր՝ սեպտեմբերի 24-ին, լրագրողների հետ զրույցում նշեց ՀՀ փոխվարչապետ Տիգրան Ավինյանը՝ անդրադառնալով հարցին, թե ինչ հակասություններ կան Նիկոլ Փաշինյանի եւ Արթուր Վանեցյանի միջեւ:

Նա դժվարացավ ասել, թե Փաշինյանի հետ ինչ պայմանավորվածությունների մասին է խոսում ԱԱԾ նախկին ղեկավարը. «Կարող եմ ասել, որ ցավով եմ հետեւում պարոն Վանեցյանի հայտարարությունների շարքին: Կարծում եմ՝ պետական պաշտոնյան, նույնիսկ պաշտոնից հեռանալուց հետո չպետք է նման ձեւով հեռանա եւ նման հայտարարություններ անի: Պաշտոնանկությունից հետո նմանատիպ հայտարարությունները ոչ միայն սպային, այլեւ շարքայինին պատիվ չեն կարող բերել: Նման ձեւով հեռացումն ինձ համար անհասկանալի է եւ անընդունելի: Ես չէի համաձայնի պնդմանը, թե դա որեւէ մտահոգության արտահայտման ձեւաչափ էր: Իմ տպավորությունը մի փոքր այլ է»,-ասաց Ավինյանը:

Նա ընդգծեց, որ ԱԱԾ տնօրենի պաշտոնակատարն արդեն նշանակվել է, իսկ տնօրենի նշանակման հետ կապված քննարկումներ չկան այս պահին:

Հարցին, թե հնարավո՞ր է, որ Վանեցյանը թողնի նաեւ ՀՖՖ նախագահի պաշտոնը, փոխվարչապետը պատասխանեց. «Այդտեղ էլ որեւէ մեկնաբանություն անել չեմ կարող»:

Հարցին, թե իր ընկալմամբ, ի՞նչ նկատի ուներ Վանեցյանը, երբ հայտարարում էր՝ իմ հրաժարականը թող «կանգ առի» ազդանշան լինի, փոխվարչապետն արձագանքեց. «Պարոն Վանեցյանը կարծես հաջորդ օրվա իր հարցազրույցում միանշանակ լավ չէր հիշում, թե այդ տեքստում ինչ է գրված, հետեւաբար, երեւի թե չմեկնաբանեմ:

Եվ պարոն Վանեցյանին, եւ պարոն Օսիպյանին պաշտոնից հեռացումները վարչապետի որոշմամբ են եղել: Վարչապետն է նախապես որոշել, որ նրանք պետռք է հեռանան իրենց պաշտոնից: Հետագա բոլոր մեկնաբանությունները պետք է այս տրամաբանության մեջ լինեն»:

Նա հավելեց, որ այլ պաշտոնյաների պաշտոնանկության հարց այս պահին չի քննարկվում:

Ինչ վերաբերում է Արթուր Վանեցյանի պնդմանը, թե վարչապետը մարդիկ է ուղարկում իր մոտ, որ ինքը չխոսի, որ վարչապետը խախտում է պայմանավորվածությունը, Ավինյանն ասաց. «Ճանաչելով վարչապետին, կարող եմ ասել, որ նա երբեք այդպիսի մեթոդներով չի առաջնրդվել: Նա չի կարող մարդ ուղարկի որեւէ մեկի մոտ, որ որեւէ մեկին լռեցնի: Դա իր մեթոդը չի, իր գործելաոճը չի: Ես չգիտեմ՝ պարոն Վանեցյանն ինչի մասին է խոսում, բայց 2018-ի թավշյա հեղափոխության ընթացքում կատարված բոլոր երեւույթները եղել են բոլորի առչքի առաջ, եղել է թափանցիկ, որեւէ ստվերային գործարք չի եղել եւ չէր կարող լինել»:

Նա նաեւ հերքեց մամուլի տեղեկությունները, թե իր եւ Արթուր Վանեցյանի հարաբերությունները լարված են եղել. «Աշխատանքային պրոցեսներում շատ տարատեսակ հարցերով լինում են տարաձայնություններ, կոշտ քննարկումներ: Մամուլում տարբեր ժամանակներում տարբեր բաներ են շրջանառվում եւ այդտեղ մամուլը հերթական անգամ մի ֆեյք ու հետաքրքիր լուր էր իր համար գտել, որն իրականությանը չի համապատասխանում»: