«Լուսավոր Հայաստանը» Նիկոլից ավելի Նիկոլ լինելու տրենդի մեջ է հայտնվել

«Մեկ Հայաստան» կուսակցության հիմնադիր, իրավաբանական գիտությունների թեկնածու Արթուր Ղազինյանը Tert.am-ի հետ զրույցում, անդրադառնալով «Լուսավոր Հայաստան» խմբակցության ներկայացրած ԱԱԾ տնօրենի և ոստիկանության պետի պաշտոնները քաղաքական դարձնելու նախագծին, ասաց, որ այդ նախագիծը, կարծես, եղել է «Լուսավոր Հայաստանի» և իշխանության միջև գործարքի ինչ-որ մի կոմպոնենտ:

Արթուր Ղազինյանը նշեց, որ այդ նախագծի նպատակներից մեկն այն է, որ այդ կառույցնեը դուրս բերվեն քաղաքական հարթություն: «Քաղաքականացման մոտիվը, որը դրվում է օրենքի հեղինակների կողմից, այն է, որ այդ սուբյեկտները լինեն խորհրդարանի հսկողության տակ, սա, իհարկե, լավ գաղափար է, նրանք, բնականաբար, պետք է ներկայանան խորհրդարան, նրանց հարցեր հղվեն: Դա իրականում շատ լավ մանիպուլացիա է իրականության, քանի որ փաստացի կատարվեց իշխանության ցանկությունը»,- ասաց նա և նշեց, որ կասկած չունի, որ իշխանությունը եթե դա չցանկանար, ապա օրինագիծը ոչ թե առաջին ընթերցում, այլ առասարակ չէր մտնի օրակարգ:

«Հետևաբար դա կարծես թե եղել է «Լուսավոր Հայաստանի» և իշխանության միջև գործարքի ինչ-որ մի կոմպոնենտ, այստեղ նպատակը պարզ է, որ առաջիկայում նշանակումներն արվեն արդեն առանց որևէ սահմափակման, և կարող են նշանակել ցանկացածին, որը կհամապատասխանի ԱԺ պատգամավորի համար սահմանված չափանիշներին: Դրանով իշխանության ձեռքերը կազատվի, և իրենք կնշանակեն իրենց ուզած մարդուն` արդեն համակարգից դուրս»,- ասաց նա և նշեց, որ սրա վտանգները բավականին մեծ են առ այն, որ արդյոք համակարգը կընդունի համակարգից դուրս նշանակված մարդուն:

«Այսօր ԼՀԿ-ի մոտ մի բան եմ նկատում, որ ինչ-որ մի տրենդի մեջ են հայտնվել՝ Նիկոլից ավելի Նիկոլ լինելու տրենդն է, որը կարծում եմ, որ մոդայից դուրս է եկել և պետք է ավելի լուրջ բաների մասին մտածել: Հենց ինքը Նիկոլն է փորձում դուրս գալ այդ վիճակից, կերպարից առավել լուրջ լինելու, պետական գործչի կերպար ձեռք բերելու համար, մինչդեռ տեսնում ենք, որ ընդդիմության որոշ լիդերներ, գործիչներ փորձում են նմանակել Նիկոլ Փաշինյանին, ինչը կարծում եմ, որ այնքան էլ հեռանկարային չէ»,- ասաց նա:

Հիշեցնենք, որ «Ազգային անվտանգության մարմիններում ծառայության մասին», «ՀՀ օրենքում փոփոխություններ կատարելու մասին», «Ոստիկանությունում ծառայության մասին», «ՀՀ օրենքում փոփոխություններ կատարելու մասին», «Հանրային ծառայության մասին» ՀՀ օրենքում լրացում կատարելու մասին» օրենքի նախագծով առաջարկվում է Ազգային անվտանգության ծառայության տնօրենի և Ոստիկանության պետի պաշտոնները հանել ոստիկանության պաշտոնների և ազգային անվտանգության մարմինների ծառայողների պաշտոնների անվանացանկերից և դրանք համարել քաղաքական պաշտոններ՝ այդ աշխատատեղերում նշանակվող անձանց համար ևս սահմանելով պատգամավորի թեկնածուին ներկայացվող պահանջները: