Աշխարհի Գավաթ. Լևոն Արոնյանը ոչ-ոքի խաղաց 1/8 եզրափակչի երկրորդ պարտիայում. դիմակայության հաղթողը կորոշվի թայ-բրեյքում

Ռուսաստանի Խանտի Մանսիյսկ քաղաքում ընթացող շախմատի աշխարհի գավաթի խաղարկության 1/8 եզրափակչի երկրորդ պարտիայում Լևոն Արոնյանը սպիտակներով 32-րդ քայլում ոչ-ոքի խաղաց վիետնամցի Լե Քուանգ Լյեմի հետ: Այս մասին հայտնում է ՀԱՕԿ պաշտոնական կայքը:

1/8 եզրափակիչի առաջին պարտիայում ևս գրոսմայստերները բաժանվել էին հաշտությամբ: Դիմակայության հաղթողը կորոշվի թայ-բրեյքում, որը տեղի կունենա սեպտեմբերի 22-ին:

Հիշեցնենք, որ Հայաստանի մյուս 3 ներկայացուցիչները դուրս են մնացել պայքարից: Ռոբերտ Հովհաննիսյանը և Հայաստանի գործող չեմպիոն Արման Փաշիկյանը չէին հաղթահարել առաջին շրջանի արգելքը, իսկ Սերգեյ Մովսեսյանը երկրորդ շրջանում պարտվել էր չինացի Դին Լիրենին:

Լևոն Արոնյանն աշխարհի գործող գավաթակիրն է: