Ըստ ՄԱԿ-ի զեկույցի՝ մինչև 2025 թ. Հայաստանի բնակչությունն աճ կգրանցի, բայց դրանից հետո բնակչության նվազում ենք արձանագրելու

Արցախի Հանրապետության մայրաքաղաք Ստեփանակերտի Վերածննդի հրապարակում հանրահավաքի ընթացքում ՀՀ վարչապետ Նիկոլ Փաշինյանն իր ելույթի ընթացքում նշեց, որ Կառավարության երկարաժամկետ ռազմավարության համաձայն՝ նախատեսվում է մինչև 2050 թ. Հայաստանի բնակչությունը հասցնել 5 մլն-ի:

Էթնոսոցիոլոգ Միհրան Գալստյանը Tert.am-ի հետ զրույցում կարծիք հայտնեց, թե բնակչության կրկնապատկման մասին հայտարարության համար մի քանի հիմքեր կան՝ ծնելիության աճ, սոցիալական որոշակի պայմանների ստեղծում, Սփյուռքի ներուժի օգտագործում, էթնիկ այլ հանրույթների ներգրավվում. «Ըստ էության, դժվար է ասել՝ որքանով այս ամենը կիրականացվի: Պետք է հաշվի առնել, որ դրական սցենարների կողքին պետք է լինի նաև բացասական սցենար: Ես չեմ տեսնում, որ տնտեսության լավացումը կարող է բերել այդ ռեսուրսների պահպանման: Իմ գնահատմամբ՝ սա չափազանցված թիվ է»:

Գալստյանը նաև նշեց, որ մասնագիտական հաշվումները ցույց են տվել, որ առաջիկայում Հայաստանը կարող է ունենա մահացության թվի ավելացում և ծնելիության թվի անկում. «Այսօր Հայաստանում միջին վիճակագրական ընտանիքում ձգտում են ունենալ մեկ երեխա, բայց ամեն ինչ անել այդ երեխայի համար: Այսինքն՝ արժեքային համակարգի փոփոխության խնդիրն էլ կարող է իր ազդեցությունը թողնել ժողովրդագրական պատկերի վրա»:

Tert.am-ի հետ զրույցում ՄԱԿ-ի Բնակչության հիմնադրամի գործադիր ներկայացուցիչ Ծովինար Հարությունյանն էլ կարծիք հայտնեց, որ 5 մլն-ի ցուցանիշն ավելի շատ ուղենիշ է, կամքի արտահայտություն, տեսլական, ցանկություն, քան կանխատեսումների վրա հիմնված բան. «Հուլիս ամսին ՄԱԿ-ը հրապարակեց 2019-ի նոր կանխատեսումները՝ «Աշխարհի բնակչության հեռանկարները»: Այստեղ, եթե միջին սցենարով վերցնենք, ապա կտեսնենք, որ մինչև 2025 թ. մենք մի փոքր աճ կգրանցենք՝ հասնելով 2 մլն 977 հազարի, բայց դրանից հետո բնակչության նվազում ենք արձանագրելու՝ 2050 թ. հասնելով 2 մլն 816 հազարի: Ես ուզում եմ ֆիքսել, որ սա պարզապես կանխատեսում է. ՄԱԿ-ի կանխատեսումները հաշվի են առնում նախորդ տարիների 5-ամյա կտրվածքով զարգացումները, գրանցված իրավիճակը և նմանատիպ այլ երկրների իրավիճակը, որոնք նույն գործընթացով են անցնում, դա էլ պրոեկցիա է արվում ապագայի վրա: Այս տեսլականը, որ մեզ է ներկայացնում Կառավարությունը ոչ թե անցյալի վրա հիմնված է, այլ ուղենիշ է, թե ինչ ուղղություն ենք որդեգրել»:

Ծովինար Հարությունյանը նաև նշեց, որ ՄԱԿ-ի 2019 թ. և 2017 թ. կանխատեսումների համեմատականը ցույց է տալիս, որ Հայաստանում բնակչության կրճատման հարցում կա որոշակի դրական դինամիկա:

«Բնակչությունն ավելի քիչ է կրճատվում, քան 2017-ի թվերն էին ցույց տալիս, բարելավվում է ծնելիության գործակիցը, սելեկտիվ աբորտներն են հասնում նորմայի, այսինքն՝ վերջին երկու տարում էլ փոփոխություններ կատարվել են, որ դրանց պրոյեկցիան էլ այսօր մեզ ավելի լավ կանխատեսումների հնարավորություն է տալիս, քան 2017-ի թվերն էին:

Մենք Սերժ Սարգսյանի 4 մլն-ի մասին հայտարարության ժամանակ էլ ասել էինք ու հիմա էլ ասում ենք, որ շատ լավ է, որ պետությունն առաջնահերթություն է համարում բնակչության աճը և ժողովրդագրական հարցերը, բայց այս պահին մենք չենք կարող ասել՝ դա իրատեսակա՞ն է, թե՞ ոչ, քանի որ մենք չունենք այն գործողությունների ցանկը, որը պլանավորվում է իրականացնել»,- նշեց Ծովինար Հարությունյանը: