Գնահատական չեմ կարող տալ, միայն կասեմ՝ եթե Մանվել Գրիգորյանը շարունակեր գտնվեր ՔԿՀ-ում, այո՛, խոշտանգում կլիներ. ՄԻ պաշտպան

Այս պահին նման խոշտանգման մասով գնահատական չեմ կարող տալ, միայն կասեմ, որ եթե Մանվել Գրիգորյանը շարունակեր գտնվեր ՔԿՀ-ում, այո, խոշտանգում կլիներ։ Ոչ միայն խոշտանգում, այլ անմարդկային վերաբերմունք, դա միջազգային կանոն է. ԱԺ-ում լրագրողների հետ զրույցում ասաց ՀՀ Մարդու իրավունքների պաշտպան Արման Թաթոյանը:

Նա նշեց, որ այս հարցում ՄԻՊ-ի դիրքորոշումը ուղիղ համընկնում է ՄԻԵԴ-ի դիրքորոշումներին և հիշեցրեց, որ երբ Մանվել Գրիգորյանը գտնվում էր Նաիրի ԲԿ-ում և նրան տեղափոխեցին ՔԿՀ, իրենք փաստաբանի խնդրանքով անհապաղ այցելեցին Մանվել Գրիգորյանին և ուսումնասիրեցին նրա բժշկական փաստաթղթերը, քանի որ փաստաբանները մտահոգություն էին հնչեցրել, որ նրա կյանքին վտանգ է սպառնում։

«Մենք ուսումնասիրեցինք բոլոր փաստաթղթերը, այդ թվում նաև քաղաքացիական բժշկի հետազոտությունը, ով նշել էր, որ նրա կյանքին վտանգ է սպառնում: Այստեղ պարզապես ակնհայտ էր, որ ՔԿՀ-ն չունի այն պայմանները, որ կարող է երաշխավորել նրա առողջական վիճակը: Մենք միանգամից հայտարարություն արեցինք, որ պետք է հետ տեղափոխվի քաղաքացիական հիվանդանոց: Իմ հայտարարությունից ժամեր անց տեսա ՄԻԵԴ-ի միջամտությունը և հայտարարությունը, որ նրան պետք է տեղափոխել Նաիրի ԲԿ։ ՄԻԵԴ-ը բառացիորեն մի քանի ժամ հետո հայտարարեց այն, ինչ ես հայտարարել էի մի քանի ժամ առաջ. նույն բանը, որովհետև մենք աշխատում ենք նույն դատարանների սկզբունքներով և անկախ նրանից, թե ինչ հանցանքի մեջ է մեղադրվում մարդը, եթե ՔԿՀ-ն չունի այդ պայմանները, տեղափոխելու նախաձեռնությունը ճիշտ չէր։ Այդ նախաձեռնությունն էր պատճառը, որ ՀՀ-ի վերաբերյալ ՄԻԵԴ-ը կայացրեց 39-րդ հոդվածով միջամտություն, որը բացառիկ դեպքերում է անում»,-ասաց նա: