Քաղաքապետարանը պարզապես պրոֆեսիոնալ մոտեցում չի ցուցաբերում. Դավիթ Խաժակյան (տեսանյութ)

Կարծում եմ, որ եթե քաղաքապետարանն ունենար պրոֆեսիոնալ իրավաբանական թիմ, կկարողանար «Սանիտեկի» հետ կնքած պայմանագրից օգտվել և կհայտարարեր նոր օպերատորի մրցույթ: Այս մասին Tert.am-ի հետ զրույցում ասաց Երևանի ավագանու «Լույս» խմբակցության անդամ Դավիթ Խաժակյանը:

«Քաղաքապետարանը պարզապես պրոֆեսիոնալ մոտեցում չի ցուցաբերում: Որքանով հասկանում է՝ խնդիրը փորձում է այդքանով էլ լուծել: Ակնհայտ է, որ մայրաքաղաքում աղբահանությունը ձախողվել է, բայց փոխանակ քաղաքապետարանը փորձեր դրան լուծում տար և խզեր պայմանագրերից մեկը, գնաց այն ճանապարհով, որ փորձեց զուգահեռաբար աշխատանք տանել: Բայց, քանի որ քաղաքապետարանի համայնքային հիմնարկը չի համագործակցում «Սանիտեկի» հետ, և գործունեությունները չեն համակարգվում՝ խնդիրները մնում են արդիական»,-ասաց Խաժակյանը:

Նրա խոսքով՝ 3 տարի է, ինչ մայրաքաղաքում գոյություն ունի աղբահանության խնդիրը՝ հատկապես ամռան ամիսներին:

Խաժակյանն ասաց, որ դեռևս նախորդ տարվա հոկտեմբեր-նոյեմբեր ամիսներին ակնհայտ էր, որ վիճակը սրվելու է՝ հաշվի առնելով «Սանիտեկի» ունեցած հզորությունները, և հենց այդ ժամանակ պետք է նոր ներդրումներ կատարվեին: Ըստ Խաժակյանի՝ քաղաքապետարանի հետ տեղի ունեցան քննարկումներ, որոնց արդյունքում որևէ քայլ չկատարվեց, և «Սանիտեկը» շարունակեց մի կողմից պատշաճ չկատարել մայրաքաղաքի աղբահանությունը, մյուս կողմից քաղաքապետարանը միջոցներ չձեռնարկեց, որ այդ խնդիրները կարգավորվեն: «Արդյունքում իրավիճակն իսկապես սրվեց: Քաղաքապետարանն այժմ ոչ մի բանակցություն չի վարում «Սանիտեկի» հետ և ասում է, որ եղած միջոցներով՝ այդ թվում համայնքային նոր ստեղծված հիմնարկով կկարողանա աղբահանությունը կատարել»,-ասաց Խաժակյանը:

Մանրամասները՝ տեսանյութում

Բաժանորդագրվեք Top-News.am-ին Telegram-ում