Ռամոսը պարտքերի պատճառով ցանկանում է հեռանալ «Ռեալից»

Մադրիդի «Ռեալի» ավագ Սերխիո Ռամոսը ֆինանսական խնդիրների պատճառով մտադիր է հեռանալ Արքայական ակումբից:

Sport.es-ի համաձայն՝ իսպանացի պաշտպանը 35 միլիոն եվրոյի վարկ ունի բանկում: 33-ամյա ֆուտբոլիստը Banco Santander բանկից վարկ է վերցրել Մադրիդի ծայրամասերից մեկում հողատարածք գնելու եւ բնակելի թաղամաս կառուցելու համար, սակայն քաղաքի իշխանությունները հավանություն չեն տվել այդ նախագծին: Ռամոսն արդեն բանակցություններ է վարում պարտքը մարելու վերաբերյալ:

Ավելի վաղ հայտնի էր դարձել, որ իսպանացին գայթակղիչ առաջարկ է ստացել Չինաստանի Սուպերլիգայի ակումբներից մեկից: «Ռեալը» պատրաստ է նրան բաց թողնել 100 միլիոն եվրոյի դիմաց: Արքայական ակումբում Ռամոսը ստանում է տարեկան 12 միլիոն եվրո աշխատավարձ: