«Արսենալը» պարտվեց «Վուլվերհեմփթոնին». Մխիթարյանը մասնակցեց հանդիպմանը

Անգլիայի Պրեմիեր լիգայի 31-րդ տուրի հետաձգված խաղում Լոնդոնի «Արսենալը» հյուրընկալվելիս մրցեց «Վուլվերհեմփթոնի» հետ: Ինչպես հայտնում է Armsport-ը, Էմերիի ֆուտբոլիստներն արդեն առաջին խաղակեսում 3 գնդակ ընդունեցին սեփական դարպասը:

Տանտերերի կազմում հաշիվը բացեց Նևեշը: Մի քանի րոպե անց Դոյերտին կրկնապատկեց իր թիմի առավելությունը, իսկ առաջին կեսում մրցավարի ավելացրած երկրորդ րոպեին Ժոտան խփեց երրորդ գոլը:

«Զինագործները» երկրորդ խաղակեսում խփեցին միայն հեղինակության գնդակը: Աչքի ընկավ Սոկրատիսը՝ 3:1: Հայաստանի հավաքականի ավագ Հենրիխ Մխիթարյանը լոնդոնցիների մեկնարկային կազմում էր: Մեր ընտրանու խաղացողը փոխարինվեց 58-րդ րոպեին: Այս պարտությունից հետո «Արսենալը» 66 միավորով կլինի 5-րդ տեղում: «Վուլվերհեմփթոնը» 51 միավորով 7-րդն է: