Չի բացառվում, որ «Սպայկա» ընկերության պետական բյուջե չվճարած 7 մլրդ դրամն ավելանալու է. Անանյան

Չի բացառվում, որ «Սպայկա» ընկերության պետական բյուջե չվճարած 7 մլրդ դրամն ավելանալու է, քանի որ մենք ունենք 3,5 տարվանն առնչվող առերեւույթ հանցագործություն պարունակող վարքագիծ: Այդ մասին այսօր՝ ապրիլի 11-ին, լրագրողների հետ զրույցում ասաց ՊԵԿ նախագահ Դավիթ Անանյանը:

«Մենք այդ վարքագծի ընդամենը 30 տոկոսին առնչվող ժամանակագրական առումով ունենք փաստաթղթեր: Ինչ ցույց կտան հաշվարկները չեմ կարող ասել»,- ասաց Անանյանը:

Նա նաեւ ասաց, որ այս պահին վարչապետն ու ՊԵԿ նախագահն այդքան էլ իրավասու չեն տեղեկատվություն ներկայացնելու. «Իրավական գործընթաց է գնում, եւ այստեղ ամենակարեւոր մարդը քննիչն է, եւ ինքն է փաստական հանգամանքների վերաբերյալ ինքն է դատողություններ անում մասնագետների հետ խորհրդակցելով: Եւ եթե ինքն ունի այնպիսի համոզմունք, որ, օրինակ, ազատության մեջ գտնվելով, կվնասի քննությանը, ինքը միջնորդում է դատարանին, որն էլ այդպիսի որոշում է կայացրել:Իրավական գործընթաց է գնում եւ դրա վերաբերյալ վարչապետն ու ՊԵԿ նախագահը որեւէ գնահատական չեն կարող տալ»:

Նշենք, որ, ըստ մամուլի հրապարակումների, միրգ-բանջարեղեն մթերող «Սպայկա» ընկերության շուրջ ծավալված աղմուկից հետո շուկա է մուտք գործում նոր ընկերություն: Խոսքը «Բեստ Ֆրութ Լոգիստիկս Ցենտր» ընկերության մասին է, որը ևս զբաղվում է պտուղ-բանջարեղենի մթերմամբ:

Հիշեցնենք, որ ապրիլի 8-ին Երեւանի ընդհանուր իրավասության դատարանի դատավոր Կարեն Ֆարխոյանը որոշում կայացրեց բավարարել ՊԵԿ քննչական վարչության միջնորդությունն ու երկու ամսով կալանավորել «Սպայկա» ընկերության տնօրեն Դավիթ Ղազարյանին:

Առանձնապես խոշոր չափերով հարկերը չվճարելու դեպքի կապակցությամբ հարուցված քրեական գործի շրջանակում 2019թ. ապրիլի 4-ին Ղազարյանին մեղադրանք է առաջադրվել ՀՀ քրեական օրենսգրքի 205-րդ հոդվածի 2-րդ մասի (առանձնապես խոշոր չափերով hարկ, տուրք կամ պարտադիր այլ վճար չվճարելը) հատկանիշներով։

Ըստ ՊԵԿ հաղորդագրության՝ «Սպայկա» ընկերությունը պետական բյուջե չի վճարել ընկերության կողմից իրականացված ձեռնարկատիրական գործունեության արդյունքում առաջացած 7 036 666 312 ՀՀ դրամ մաքսատուրք եւ հարկ: