2019-ի հուլիսի 1-ից 10 տոկոսով կբարձրանա զինծառայողների, սեպտեմբերի 1-ից` ուսուցիչների աշխատավարձը. վարչապետ

«2019 թվականի պետական բյուջեի եկամտային մասը կգերակատարենք առնվազն 40 միլիարդ դրամով։ Սա մոտավորապես 90 միլիոն դոլար է», - այսօր Ազգային ժողովում Կառավարության ծրագրի կատարման ընթացքի և արդյունքների մասին զեկույցը ներկայացնելիս հայտարարեց վարչապետ Նիկոլ Փաշինյանը։

Այսինքն, ըստ վարչապետի, պետական եկամուտները 2019 թվականին կլինեն առնվազն այսքանով ավել, քան նախատեսված է Ազգային ժողովի կողմից ընդունված պետական բյուջեով։

«Սա ուզում եմ ընդգծել, որ վերջին 9 տարիների համար աննախադեպ երևույթ է։ Մենք մտադրված ենք 2019 թվականի հուլիսի 1-ից 10 տոկոսով բարձրացնել Հայաստանի Հանրապետության զինված ուժերի զինծառայողների աշխատավարձն, իսկ 2019 թվականի սեպտեմբերի 1-ից նույն չափով բարձրացնել Հայաստանի Հանրապետությունում հանրակրթական դպրոցներում աշխատող ուսուցիչների աշխատավարձը՝ մոտավորապես 38 հազար ուսուցչի մասին է խոսքը։ Բացի այս մենք պլանավորում ենք այս տարի իրականացնել շուրջ 303 կիլոմետր ավտոճանապարհների տարբեր մակարդակի նորոգումներ՝ հիմնանորոգում, ընթացիկ նորոգումներ, ինչը նույնպես աննախադեպ ցուցանիշ է վերջին 9 տարիների համար», - ասաց վարչապետը։