Ինչ որ ասվեց պարզ էր չէ՞, դադարեցրեք քննարկումը, կգնաք ու կիրականացնեք այն, ինչ ասվեց. վարչապետի կոշտ արձագանքը

Կառավարության այսօրվա նիստում, երբ քննարկվում էր «Համո Բեկնազարյանի անվան «Հայֆիլմ» կինոստուդիա» փակ բաժնետիրական ընկերության անշարժ գույքը «Կինոկետ Փրոդաքշնս» սահմանափակ պատասխանատվությամբ ընկերությանը վարձակալությամբ տրամադրելուն հավանություն տալու մասին որոշման նախագիծը, վարչապետը հարցրեց, թե արդյոք վարձակալի պարտավորությունները շատ հստակ գրված են:

«Այսինքն՝ պետք է կինոգործունեություն ծավալվի, չի կարող տարածքը որևէ այլ նպատակով օգտագործել: Եթե մենք ասում ենք մինչև հինգ տարվա ընթացքում պետք է կատարի ներդրում, ենթադրենք, չորս տարի, յոթ ամիս որևէ ներդրում չկատարելը նշանակում է, որ ինքը պայմանագիրը չի խախտել։ Կարծում եմ՝ եթե ներդրման մտադրությունը լուրջ է, որևէ խնդիր չկա»,-ասաց նա։

Փոխվարչապետ Տիգրան Ավինյանը միջամտեց. կարծում է, որ «Հայֆիլմ»-ի շահերից է բխում, որ տարածքները բարեկարգվեն։ «Պայմանագիրը կցված չէ որոշմանը, քանի որ կարիքը չկար և , անկեղծ ասած, այս որոշման կարիքն էլ չկար»,-ասաց Ավինյանը։

Նիկոլ Փաշինյանը կոշտ արձագանքեց. «Եթե կարիքը չկար, ինչո՞ւ եք բերել նիստ»: Տիգրան Ավինյանը արձագանքեց՝որպեսզի նմանատիպ նախաձեռնողականությունը խրախուսելի լինի:

Պետգույքի կառավարման կոմիտեի նախագահ Նարեկ Բաբայանն էլ ասաց, թե այս նախագիծը պնդել են, որ ներկայացվի, քանի որ «Հայֆիլմ» ՓԲԸ-ն մասնավորեցման ցանկում է գտնվում։ «Ուղղակի նպատակահարմար գտանք, որ կառավարությունը քննարկի»,-ասաց նա, սակայն վարչապետը կոշտ ընդհատեց նրան:

«Պարո՛ն Բաբայան, կներեք էի, ինչ որ ասվեց, պարզ էր, չէ՞: Դադարեցրե՛ք քննարկումը, կգնաք ու կիրականացնեք այն, ինչ ասվեց»,-ասաց նա: