Սուբսիդավորում. գյուղացիները կարող են վարկ վերցնել 5 տոկոսով, գյուղկոոպերատիվները՝ 3 տոկոսով

Կառավարությունն իր այսօրվա՝ մարտի 7-ի նիստում հաստատեց Գյուղատնտեսության ոլորտին տրամադրվող վարկերի տոկոսադրույքների սուբսիդավորման ծրագիրը, որ նախատեսում է, որ գյուղացիները կարող են վարկ վերցնել մինչեւ 5 տոկոսով, գյուղացիական կոոպերատիվները՝ 3 տոկոսով, իսկ սահմանամերձ բնակավայրերի բնակիչները զրո տոկոսով :

Հարցը ներկայացրեց գյուղատնտեսության նախարարի պարտականությունները կատարող Գեղամ Գեւորգյանը:

Նա ընդգծեց, որ այս որոշման ընդունման անհրաժեշտությունը պայմանավորված է նրանով, որ գյուղոլորտին տրամադրվող վարկերի տոկոսադրույքների սուբսիդավորման ծրագրին հավանություն տալու որոշմամբ ընդունված ծրագրի մեկնարկից անցած ժամանակահատվածի փորձը ցույց է տվել տրամադրվող սուբսիդավորվող վարկերի հանդեպ բավականին մեծ է պահանջարկը։

10 մլն դրամի շեմը գերազանցող գումարների նկատմամբ եւս պահանջարկ կա, որը պայմանավորված է տնտեսությունների խոշորացման, արտադրական հզորությունների ընդլայնման, կապիտալ ներդրումների ավելացման ուղղություններով կատարվող ներդրումների անհրաժեշտությամբ։

«Կառավարության 2017 թվականի սեպտեմբերի 14-ի նիստի N 39 արձանագրային որոշման հիման վրա մեկնարկել է Գյուղատնտեսության ոլորտին տրամադրվող վարկերի տոկոսադրույքների սուբսիդավորման ծրագիրը, որի շրջանակներում գյուղատնտեսությունում տնտեսավարողներին տրամադրվում են 3-10 մլն դրամ գումարի, մինչեւ 14% տոկոսադրույքով վարկեր, որոնց 7 տոկոսային կետը, իսկ սոցիալական աջակցություն ստացող սահմանամերձ համայնքների եւ գյուղատնտեսական կոոպերատիվների համար 9 տոկոսային կետը սուբսիդավորվում են։

Ծրագրի սկզբից մինչեւ 2018 թվականի դեկտեմբերի 31-ն ընկած ժամանակահատվածում տրամադրվել է 6195 միավոր վարկ 26,1 մլրդ դրամ գումարով, միայն 2018 թ.-ին՝ 5282 միավոր վարկ 21.9 մլրդ գումարով։ Մեկ վարկի միջին չափը կազմել է շուրջ 4.2 մլն դրամ:

Տրամադրված վարկերը ունեցել են հետեւյալ հիմնական ուղղությունները՝ անասնաբուծություն՝ 65 %, ջերմոցային տնտեսություն՝ 7%, բուսաբուծություն (դաշտավարություն, պտղաբուծություն)՝ 24 %, այլ՝ 4 %։

Կատարված ուսումնասիրությունները ցույց են տվել, որ հիմնական միջոցների ներդրմանն ուղղված 1 դրամ սուբսիդիան 5 տարում ստեղծում է 5.8 դրամ հավելյալ արժեք։

Ուսումնասիրությունները ցույց են տվել, որ ծրագրով սահմանված 3-10 մլն դրամ վարկավորման գումարը երբեմն բավարար չի լինում տնտեսությունների խոշորացման, արտադրական հզորությունների ընդլայնման, կապիտալ ներդրումների ավելացման խնդիրների լուծման համար։ Կա պահանջարկ ավելի մեծ գումարի վարկեր ստանալու նկատմամբ։

Միաժամանակ սոցիալական աջակցություն ստացող սահմանամերձ բնակավայրերում գյուղատնտեսական գործունեությունը խթանելու համար անհրաժեշտություն կա բարձրացնել վարկերի տրամադրման պայմանների մատչելիությունը»,-ասաց Գեւորգյանը:

Նրա խոսքով, կարգավորման նպատակն է` վարկավորման պայմանների բարելավման միջոցով նպաստել կապիտալ ներդրումների ծավալների ավելացմանը, արտադրական հզորությունների ընդլայնմանը, տնտեսությունների խոշորացմանն ու տնտե-սավարողների համար տոկոսադրույքների սուբսիդավորմամբ վարկերի ստացման ճանապարհին լրացուցիչ խոչընդոտների վերացմանը։ Նախագծով նախատեսվում է ավելացնել տրամադրվող վարկերի գումարի վերին շեմը՝ դարձնելով այն 3-15 մլն դրամ:

Հայաստանի Հանրապետության կառավարության 2014 թվականի դեկտեմբերի 18-ի N 1444-Ն որոշմամբ հաստատված սոցիալական աջակցություն ստացող սահմանամերձ բնակավայրերի համար վարկերի տոկոսադրույքի սուբսիդավորումը կիրականացվի այնպիսի չափաքանակով, որպեսզի վարկերը տնտեսավարողներին տրամադրվի 0 % տոկոսադրույքով։

2019 թվականին կտրամադրվի շուրջ 5100 միավոր վարկ՝ 20-22 մլրդ գումարի սահմաններում, սուբսիդավորման գումարը կկազմի շուրջ 2.2 մլրդ դրամ, որից 2.0 մլրդ դրամը նախատեսված է ՀՀ 2019 թվականի պետական բյուջեով, իսկ 200 մլն դրամը կտրամադրվի 2019 թվականի պետական բյուջեով նախատեսված, սակայն տնտեսական արդյունավետության տեսանկյունից իրականացման համար ոչ նպատակահարմար ճանաչված «Փոքր գյուղացիական տնտեսություններին տրամադրվող վարկերի տոկոսադրույքների սուբսիդավորման» ծրագրի բյուջեից։